Koordenadora Jerál Komisaun Nasionál Prevensaun Covid-19, Odete da Silva Viegas fó sai liu-husi konferénsia imprensa iha salaun Ministériu Saúde, Kaikoli, Dili, Tersa (09/02/2021), haktuir, pasiente foun na’in-neen ne’e tama iha kategoria asimtomátiku.

Pasiente na’in neen ne’e, kompostu husi feto na’in-haat ida-idak ho tinan 61, 45, no na’in-rua ho tinan hanesan 34. No mane na’in-rua ho tinan 53 no ida seluk tinan tolu.

Odete haktuir, pasiente na’in-neen ne’e, na’in lima nu’udár família ida halo viajen husi Jakarta-Indonézia mai Kupang ho Garuda Airlines, kontinua viajen mai Atambua no iha loron 30 janeiru. Sira tama Timor-Leste liu husi pontu entrada Batugade, to’o Dili sira submete ba auto-kuarentena iha White Sand Metiaut.

Alende ne’e, sidadaun ida seluk, feto ho tinan 34 ne’ebé halo viajen husi Betun ba Atambua, hafoin husi Atambua mai Timor-Leste iha loron 28 janeiru tama liu husi fronteira Batugade, husi Batugade too nia familia iha Beto, Komoro, Dili ho motorizada (ojek).

Maski nune’e, Odete haktuir, banhira to’o Beto, familia sira la permiti tama ba uma laran no halo kedas kontaktu ba ekipa vizilánsia no lori kedan ba submete kuarentena iha Tibar hamutuk ho totál pasajeiru na’in-23.

Odete mós la esplika klaru, motorizada nia movimentasaun husi Dili ba fali fronteira Batugade.