Tuir dadus rejistadu iha Komisaun Nasional Covid-19, to’o iha 15 Setembru ema ne’ebé sei halo konfinamentu obrigatóriu na’in 587, auto-kuarentena na’in 140, hein rezultadu teste laboratóriu hamutuk na’in 93.

Númeru kumulativu suspeitu sira ne’ebé durante ne’e halo teste laboratóriu na’in 6.427, sira ne’ebé rezultadu negativu na’in 6.307, passa ona loron 14 iha konfinamentu obrigatóriu na’in 4.097 no kazu konfirmadu na’in 27. Husi númeru kazu konfirmadu, na’in ida mak sei baixa iha sala izolamentu.

Ministériu Saúde (MS) apela nafatin ba komunidade sira atu kumpre protokolu prevensaun Covid-19 nian, uza máskara, mantein distansiamentu sosiál no fase liman bebeik ho sabaun.

Entretantu, tuir dadus husi Organizasaun Mundial Saúde (OMS), to’o iha 16 Setembru ne’e kazu global Covid‑19 hamutuk 29.727.253, kazu mate 939.185 no rekuperadu hamutuk 21.542.361. Pandemia Covid-19 ne’e rasik afeita ona nasaun 213 iha mundu.