Embaixadora TL ba Portugál, Maria Paixão, rekoñese simu karta husi Ministériu Negósiu Estranjeiru TL atu buka Emília Pires. Nune’e, embaixada monta ema atu buka iha fatin hotu-hotu, maibé la konsege hetan tanba ‘nega-aan’ hodi la rejista iha embaixada hanesan timoroan.

Timoroan hotu-hotu ne’ebé rejistu iha Embaixada hanesan timoroan, sira-nia númeru telefone, email, no diresaun rejistradu iha embaixada, nune’e fasil atu ba buka tuir.

Maibé, Emília Pires ba iha ne'ebá, Embaixadora Maria Paixão la hatene no hela iha ne’ebé mós laiha informasaun ruma.

“Nia (Emília) ba hela iha ne'ebá ne’e halo saida ne’e mós ha'u la hatene, tanba ne’e problema ninian”, dehan nia, iha Palásiu Prezidensiál, Bairru-Pité, Tersa (5/3).

Tuir nia, meius barak mak Embaixada TL iha Portugál halo atu bele hetan Emília, liu husi buka diretamente to’o hein iha Igreja, maibé sira la konsege hetan arguida ne’e.

Nia hatutan, tentativa seluk maka responsavel imigrasaun ba buka duni la’o duni iha área balun ne’ebé ema sujere liu husi hatudu fotografia maibé ema dehan sira la koñese.

Foin lalais ne’e, iha semana kotuk, Tersa (26/2), arguida Emília Pires, la’o ‘halimar’ iha área Institutos de Registos e Notariado: Cidadãos, Campus de Justiça de Lisboa-Portugal.

Tuir informasaun ne’ebé diáriu ne’e hetan husi fonte balun husi Portugál katak, arguidu Emília Pires agora daudaun hela iha Estoril-Portugál.

Antes halai, arguidu Emília Pires, hetan autorizasaun husi Tribunál Munisipál Dili (TMD) ho razaun atu partisipa enkontru g7+, iha Novaiorke, iha fulan-Setembru 2016.

Tempu ne’ebá, TMD fó ba arguida Emília nia viajen ba rai li'ur durante loron 9 de'it, ho nune’e, tenke devolve fali pasaporte ba Tribunál, iha fulan-Outubru 2016, hodi asegura nafatin prosesu justisa hasoru arguida.

Maibé, hafoin to’o iha estranjeiru arguidu ne’e kontinua halai lakon no la fila hodi kontinua ninia prosesu kazu ne’ebé tama ona iha Tribunál no besik atu hetan ona sentensa.

Arguida Emília ho Madalena Hanjam, eis-Ministra Saúde, hetan akuzasaun partisipasaun ekonomia no abuzu podér iha prosesu tender fornesimentu kama ba Hospital Nasionál Guido Valadares (HNGV), iha tinan 2015, ne’ebé fó prejuizu ba Estadu osan hamutuk $811.040.