Print this page

MS Seidauk Deteta Corona Tama Timor Featured

By Janeiru 28, 2020 2985
Coronavirus Coronavirus

DILI:Diretór Nasionál Kontrola Moras, António da Costa hateten, Timor-Leste hahú preparasaun atu responde ba surtu Virus Corona dezde semana kotuk.

Nune’e, Ministériu Saúde koordena ho parte sira relevante hanesan servisu hamutuk ho diresaun ambulánsia no ospitál karik iha kazu ruma bainhira atu atende liu husi sistema reveral hodi atende espesífiku.

Iha ona profisionál saúde na’in tolu (3) maka fó atendimentu espesiál ba meiu prevensaun ho ekipamentu sira.

Iha aeroportu, iha de'it Infrared Thermometer ne’ebé bele uza hodi deteta ba pasajeiru sira karik balun isin manas. Prepara mós Screening Card ne’ebé distribui ona ba Aeroportu Bali nian liu husi ajénsia aviaun sira atu mai Timor karik bele prienxe to’o mai rekolla no halo identifikasaun.

Ita foku liuliu ba entidade sira husi xina, maibé la taka dalan mós ba pasajeiru sira seluk”, tenik António.

Surtu ne’e koordenasaun ho parte relevante sira no hetan apoiu Organizasaun Mundiál ba Saúde (OMS) ne’ebé suporta oinsá maka bele antesipa no asegura katak ema ne’e tama mai iha nasaun ne’e tenke halo teste.

Maski nune’e, servisu semana ida ona seidauk identifika pasajeiru ruma ne’ebé deskonfia ba surtu Corona Virus no provizoriamente Timor-Leste sei livre hela.

Ekipamentu hirak ne’e provizoriamente sei uza ne’ebé iha hodi identifika moras ne’e, maibé koordena nafatin ho OMS atu haree ekipamentu ne’ebé sei falta atu haree bele apoia.

Kona-ba fatin izolamentu ne’ebé karik ema balun identifika no deskonfia ba moras ne’e, servisu hamutuk ona ho parte ambulánsia no Ospitál Nasionál Guido Valadares (HNGV) hodi prepara fatin no fasilidade.

Rate this item
(0 votes)
Jose Sarito Amaral

Latest from Jose Sarito Amaral