MS Husu Konsensia Sidadaun ne'ebé Kuarentena iha Uma Featured

By Elsa Belinha Marsu 28, 2020 2846
Diretora Jeral Prestasaun Saúde MS, Odete da Silva Viegas Diretora Jeral Prestasaun Saúde MS, Odete da Silva Viegas

DILI: Ministériu Saúde (MS) husu Timor-oan sira ne'ebé foin fila husi rai li'ur no kuarentena iha idaidak nia uma atu tenke iha konsensia hodi kumpre regras ne'ebé Organizasaun Saúde Mundial (OMS) fó sai ona.

Tuir regra OMS, ema ne'ebé foin fila husi rai afetadu tenke tama kuarentena durante loron 14.

Tuir dadus husi MS, iha Timor-Leste iha ema na'in 568 mak halo kuarentena iha uma. Husi númeru ne'e na'in 207 pasa ona periodu karantina durante loron 14 no na'in 361 sei iha hela faze monitorizasaun.

Diretora Jeral Prestasaun Saúde MS, Odete da Silva Viegas hatete, kona-ba auto-karantina ne’e husu ema hotu-hotu nia konsiensia tanba saúde ne’e iha ema idaidak nia liman rasik.

"Ministériu Saúde bele hato’o informasaun nafatin, buka akonselia ba sira katak regras sira ne’ebé iha tenke kumpri mak durante loron 14 labele kontaktu ho ema seluk," dehan Odete iha edifisiu MS, Kaikoli, Sesta (27/03).

Nia dehan, ema ne'ebé tama iha periodu kuarentena tenke iha konsensia katak nia rasik tenke asegura nia an atu karik nia hetan moras labele daet ba nia maluk sira seluk ka ba nia familia.

"Pessoal saúde sira la kontrola sira 24 oras (ka) halo monitorizasaun ba sira (24 oras) tanba limitasaun rekursu umanu. Tanba ne’e kumpre izola an durante loron 14 karik iha sintomas ruma tenke liga ba pessoal saude sira," dehan nia.

Bainhira iha periodu karantina nia laran mak sira sente sintoma ruma labele hein de’it husi parte saúde maibé bele liga direitamente ba sekretariadu call center 119.

Ba sira ne'ebé karik la sente seguru kuarentena iha uma, nia dehan, bele liga sekretariadu call center atu ekipa bele haree fatin ne’ebé disponivel hodi fasilita sira.

Rate this item
(0 votes)

Independente Digital TV