Nune’e, iha diskusaun Orsamentu Jerál Estadu (OJE) tinan fiskál 2019 nian, iha Sesta (14/12), lideransa bloku Aliansa Maioria Parlamentár (AMP) halo reuniaun urjente iha sede partidu CNRT nian hodi diskute kestaun ne’e.

Iha momentu ne’e, Ministru Transporte no Telekomunikasaun, José Agostinho da Silva, levanta keixa ba sede AMP nian tanba ninia kompeténsia Diresaun Telekomunikasaun nian fó fali kompeténsia ba ema seluk.

Ministru José Agostinho hateten, semana kotuk iha duni mudansa ba estrutura Ministériu Transporte no Telekomunikasaun (MTT), ne’ebé Diresaun Telekomunikasaun muda ba fatin seluk.

“Iha duni mudansa ba estrutura, maibé ikus mai iha solusaun”, dehan nia, iha Uma Fukun Parlamentu Nasionál, horisehik.

Nia rekoñese, iha Sesta (14/12) hakat duni ba sede CNRT hato'o preokupasaun ne’e, maibé ikus mai rezolvidu tanba liña komunikasaun nakloke entre Xefe Governu ho ninia membru tomak.

Telekomunikasaun iha ninia Diresaun Nasionál Infraestrutura Telekomunikasaun ne’ebé iha funsionáriu públiku ema 44, ne’ebé hahú Primeiru Governu to’o ohin loron ba área komunikasaun hodi instala rede ba ajénsia Estadu nian.

Antes ne’e, diáriu ne’e tenta halo konfirmasaun ba Ministru Reforma Lejizlativa Asuntu Parlamentár (MRLAP), Fidelis Magalhães dismente totál informasaun ne’e.

Nia dehan, reuniaun ne’ebé halo entre lideransa AMP nian iha sede CNRT, Sesta (14/12), ko’alia kona-ba polítika jerál Governu nian, laiha diskusaun ruma kona-ba asaltu malu podér iha estrutura governu nia laran.