Moras Covid-19 Aumenta Tan Na’in Ida iha Covalima Featured

By Camilio de Sousa Fevereiru 25, 2021 1268
Kordenador Forsa Tarefa ba Prevensaun no Mitigasaun Surtu Covid-19, Rui Maria de Araújo, relata numeru kazu foun iha konferensia ba imprensa, kinta (25/2), iha sala SIJK, CCD Dili. Foto Camilio de Sousa/INDEPENDENTE  Kordenador Forsa Tarefa ba Prevensaun no Mitigasaun Surtu Covid-19, Rui Maria de Araújo, relata numeru kazu foun iha konferensia ba imprensa, kinta (25/2), iha sala SIJK, CCD Dili. Foto Camilio de Sousa/INDEPENDENTE

DILI:Sala situasaun Sentru Integradu no Jestaun (SIJK) ba Prevensaun Covid-19, relata katak aumenta tan pasiente konfirmadu na’in ida iha Munsipiu Covalima.

Kordenador Forsa Tarefa ba Prevensaun no Mitigasaun Surtu Covid-19, Rui Maria de Araújo, hatete bazea ba ekipa vijilánsia epidemiolójia, halo restriu iha Aldea Klauhalek, Suku Belulik Leten, Postu Administrativu Fatumea, Munisípiu Covalima, rekolla tán 40 amostra ba halo teste iha laboratóriu nune'e rezultadu hatudu aumenta tán kazu pozitivu covid-19 na’in-ida.

“Husi teste PCR ne'ebé halo, hetan tán pozitivu ida, mane, ninia kabén konfrimadu nu'udar kazu foun, loron rua liubá,”dehan dr. Rui iha Sala Situasaun SIJK, iha Sentru Konvensaun Dili (CCD), kinta(25/2).

Nia informa, mane ida ne’ebé konfirmadu Covid-19 ho idade tinan 69, sintomátiku, nia gasta maiór parte husi nia tempu iha to'os no hakiak karau fatin, besik baliza Indonézia, suku Lookeu, Postu Administrativu Tasi Feto barat, Munisípiu Belu

Rezultadu PCR hatudu katak CT (Cycle Threshold) valór 40, signifika nia iha faze rekuperasaun. Ida-ne'e hatudu katak nia hetan kontájiu, maizumenus entre semana rua to'o semana tolu liubá.

"Ekipa vijilánsia epidemiolójika ho laboratóriu husi nível nasionál, munisípiu Covalima nomoos Sentru Saúde Fatumea, hamutuk ema na'in-20, oras ne'e daudaun nafatin hala'o restreiu ba kontaktu sira hotu,” nia relata.

Dadus jerál covid-19 hatudu katak kazu konfirmadu 1, kazu rekuperadu 1 (husi RAEOA), kazu ativu 21 no ema tama husi fronteira husi horisehik mai ohin liu dalan regulár hamutuk 17, irregularidade na’in-4. Ema hirak ne’e tama kuarentena.

Eis Primeiru Ministru ne’e subliña, kazu foun konfirmadu na'in-6 ne'ebé kuarta-horisehik halo viajen husi Fatumea mai Dili, to'o iha Vera Cruz 11:45 kalan no sira iha kondisaun ne'ebé kolen tanba halo viajen naruk, maibé kondisaun saúde agora estável hela.

Rate this item
(0 votes)

Independente Digital TV