Print this page

Ministru Vitor Konsidera CNRT ‘Privatiza’ Tratadu Tasi Timor Featured

By Pedro Alves Setembru 18, 2020 1756
Ministru Petróleu no Minerais, Vitor Conceição Soares. Ministru Petróleu no Minerais, Vitor Conceição Soares.

DILI: Relasiona ho polémika balun mosu katak Partidu FRETILIN partidariza prosesu atu dada Greater Sunrise mai Timor-Leste, mosu reasaun husi Ministru Petróleu no Minerais, Vitor Conceição Soares katak, CNRT maka privatiza Tratadu Tasi Timor.

“Politiza iha parte ne’ebé. Hanoin buat ne’ebé Estadu nian-ne’e Estadu nian, partidu nian-partidu nian, tanba buat ne’ebé halo mandatu konstitusionál, lei haruka no orgánika governu haruka halo ne’e halo,” dehan Ministru Vitor, iha Palasiu Governu, horisehik.

Nia esplika, politiza ne’e hanesan patrimóniu Estadu nian uza fali interese partidu ne’e mak hanesan governu sira uluk (tempu ukun Partidu CNRT nian) partidariza patrimóniu Estadu.

“Imi haree hanesan ezemplu ida uluk tratadu tasi ne’e Povu, Governu no Estadu Timor-Leste gasta osan tokon ba tokon lori ema nia esforsu, partidu hotu nia esforsu, to’o amigu nasaun barak mós apoiu hodi fó presaun ba Austrália hodi obriga delimitasaun fronteira to’o asina. To’o fali mai dehan CNRT mak manan, la'ós Povu Timor-Leste. Ne’e maka dehan partidariza sasán Estadu nian ba fali partidu nian,” tenik nia.

Vitor dehan, governu daudaun sei kontinua nafatin planu hirak ne’ebé trasa ona tanba FRETILIN mai kompleta atu kontinua programa VIII governu ninian ba oin.

“Ha’u hanoin governu ida ne’e kontinuidade nia naran de'it VIII governu ne’e la'ós FRETILIN nia governu, nune’e FRETILIN mai ho mós ema ne’ebé la hanesan halo adaptasaun saida saida mak halo presiza halo ajustamentu, atu balun ne’ebé presiza hadi’a bele hadi'a,” dehan ministru.

Nia hatutan, estrutura ne’e halo daudaun no orgánika no mós iha lei estabelesimentu ne’ebé tenke halo mudansa, tanba tinan ualu ka sanulu-resin ona dezatrazadu tenke atualiza hodi halo buat foun.

 

Rate this item
(0 votes)