Mensajen Espoza PR: Labarik Sira Maka Esperansa ba Loron Aban Featured

By Komunikadu Imprensa Juñu 01, 2020 2554
Foto: Gabinete de Apoio à Actividade do Cônjuge do Presidente da República. Foto: Gabinete de Apoio à Actividade do Cônjuge do Presidente da República.

Ksolok loron mundial labarik, espesialmente ba oan doben Timor-leste nia oan sira hotu maka ha’u hadomi.

Loron ohin, lahanesan loron baibain iha tinan sira liu ba kotuk, tanba ne’e liu husi biban ida ne’e, mensajen ida ne’e ha’u hakarak hato’o ha’u-nia hakuak boot nakonu ho domin ba oan doben sira ne’ebé maka namkari iha Timor-leste nia laran tomak.

Ita hotu akompaña situasaun ne’ebé mosu iha ita-nia rai ho rai barak iha mundu, moras ho naran COVID-19. Estadu Timor Leste renova ba daruak Estadu Emerjénsia ho nune’e seidauk normaliza fali atividades sira hotu.

Oan doben sira hotu, situasaun surtu COVID-19 afeita duni ba prosesu aprendijazen labarik sira nu’udar estudante, tamba labarik sira hotu hela no hakmatek de’it iha ida idak nia fatin no balu inan ho aman haruka tiha ba iha foho. Ita hatene katak ho Estadu Emerjénsia limitasaun ba movimentu trava mós direitu balu labarik sira-nian. Maibé limitasaun sira ne’e nu’udar dalan ba prevensaun virus nia hadaet no salva ona oan doben sira husi virus ne’e. Ho Grasa Nai Maromak nian ita-nia rain livre husi mate tamba moras Virus Corona.

Ba inan aman sira, nu’udar inan, Ha’u-nia apela ba família hotu atu akompaña nafatin ita-nia oan sira iha uma. Kuidadu sira-nia saúde, fó aihan nutritiva ba sira, kuidadu ijiene no labele haluha halo tuir nafatin mensajen sira ne’ebé hato’o  ona husi Organizasaun Saúde Mundial ho Governu nian liu husi Ministeriu Saúde hodi halo nafatin prevensaun liga ba moras COVID-19 no moras seluk ne’ebé perigu ba vida labarik ki’ik sira-nian (hanesan malária, dengue, diarea ho seluk seluk tan) tamba durante ne’e ita akompaña labarik balun mate ona tamba moras dengue tuir relatóriu husi Ministériu Saúde. Husi parte sorin, ita kuidadu sira-nia saúde, ha’u husu mós ba inan aman ho família sira atu akompaña sira iha uma hodi kaer nafatin livru, kadernu , lapis hodi hakerek, lé no halo konta no seluk seluk tan, liga ba prosesu aprendizazem iha uma durante Estadu Emerjénsia.

Labarik labele sai vitima ba situasaun ida ne’e. Foin lalais ha’u ba vizita Postu Administrativu Atauro, ha’u simu informasaun husi labarik sira katak sira-nia liman tos, ha’u husu tamba sa? Tamba durante ne’e halimar los de’it, la kaer lapis ho kadernu hodi hakerek, ne’e labele. Nu’udar família tenki tau matan hodi fahe tempu ba sira atu halimar naton, estuda no ajuda inan-aman sira iha tarefa ki’ik sira ne’ebé laboot, liuliu labarik sira-nia forsa ho idade. Ho asaun sira  nune’e maka direitu labarik sira-nian ba edukasaun no saúde la soe leet de’it tamba impaktu husi COVID-19.

Ba instituisaun relevante sira maka tau matan ba labarik sira, asegura nafatin polítika ne’ebé di’ak hodi proteje labarik ki’ik no forsa laek sira-nia direitu oioin ne’ebé konsagra ona.

Ikusliu, ba Organizasaun ho Uma Mahun sira ne’ebé eziste iha rai-laran maka halibur ona oan ki’ak ki’ik oan sira ne’ebé lakon inan-aman, abandonadu, balun ne’ebé lahetan domin, lahetan nesesidade husi inan-aman tamba kbiit maka mukit, balu mós tamba kondisaun fizika ne’ebé limitadu maka uma mahun sira kuida ba, ha’u hato’o ha’u-nia obrigada wain ba ita-boot sira-nia organizasaun, kongregasaun no misaun ne’ebé sagrada.

Ita-boot sira hakonu ona labarik sira ho saida maka ita-boot sira bele halo, tuir idaidak nia programa no atividades. Ha’u-nia orasaun ba Nai sei haraik tulun ba ita-boot sira hotu hodi kontinua nafatin knaar sira ne’e no kuidadu sira sai labarik ne’ebé forte iha isin no klamar nian.

Mai ita hadook kiik sira hosi moras oioin no  hahalok ladi’ak sira ne’ebé sei trava sira-nia futuru. “Labarik sira maka esperansa ba loron aban bainrua nian, atu realiza esperansa sira ne’e ita hotu tenki investe ka tau matan hahú husi familia”.

Viva Labarik Timor Leste!

Hakoak boot ho domin tomak husi Inan-Nasaun

Cidália Nobre Lopez Mouzinho Guterres.

Rate this item
(0 votes)

Independente Digital TV