Membru Governu Foun Presiza Teste Psikolojia Featured

By INDEPENDENTE Agostu 18, 2017 2318
Palacio Governu Palacio Governu

DILI: Sidadaun hotu-hotu ne’ebé atu selesiona ba prienxe kargu membru governu presiza liu husi teste psikolojia, nune’e bainhira kaer ukun bele hatene foti desizaun hodi la implika ba dezenvolvimentu iha futuru.

Polítika ne’e presiza tebes atu halo hodi bele identifika ne’ebé kompetente no iha duni kapasidade hodi kaer ukun.

“Tenke halo teste ba ema nia psikolojia. Ita lakohi ema ne’e ba iha ne'ebá ko'alia runguranga, la komprende buat barak, ikus mai implikasaun fali ba ita nia dezenvolvimentu”, Observadór Polítiku, Francisco Mausoro, iha Dili, horisehik.

Governasaun mai ne’e, ninia baze mak kumpre buat ne'ebé loos no tenke brani halo. Labele hili ema maibe la konsege halo no ezekuta programa ne’ebé nia rasik halo.

Aprezenta Riku Soin Bainhira Kaer Ukun

Nune’e, atu Kombate Korrupsaun Koluzaun Nepotizmu (KKN) bainhira lider partidu polítiku sira ne'ebé atu ukun, tenke aprezenta uluk riku-soin. Tanba, ba governasaun ne'ebé moos no akuntabel nesesáriu atu halo. Ne’e duni, ministru hotu-hotu iha obrigasaun tenke deklara riku-soin ba Estadu.

“Tenke aprezenta riku-soin ne’e mai husi ne'ebé? Família ne’e mai husi ne'ebé? Tanba ita ko'alia hanesan ne’e atu produs buat ne'ebé di'ak ba ita nia nasaun”, tenik nia.

Kritériu seluk ba membru governu foun labele iha dupla sidadania, pasadu hatudu ona katak Eis-Ministra Finansas (MF), Emília Pires, ne’ebé akuzadu envolve korrupsaun ikus mai halai lakon tanba iha sidadania rua.

Mausoro rekoñese katak Konstituisaun hatuur atu bele iha sidadania dupla, maibé ne’e ba povu sira, ukun na’in sira tenke tau kritériu labele akontese tan hanesan mosu ba Eis-Ministra Finansas (MF), Emília Pires.

Deklarasaun hanesan mós hato’o husi Diretór Ezekutivu Yayasan HAK, Manuel Monteiro. Nia dehan, atu kombate KKN membru governu sira ne’ebé atu kaer pasta ministru ruma sira tenke aprezenta uluk sira nia rikeza atu labele mosu fali tendénsia polítika.

Tanba ho polítika ne’e, públiku bele kontrola no hatene tuir ministru ida nia riku-soin hira no to’o nia mandatu remata.

Nia dehan, presiza membru governu sira tenke deklara antes forma governu, tanba bainhira ko'alia kona-ba transparénsia, akuntabilidade tenke hatudu uluk hodi ema ema hotu haree.

Nune’e iha mandatu laran maka sira iha mudansa ruma ba iha sira nia riku-soin ne’ebé maka sira deklara antes ne’e públiku bele kestiona, karik sira hetan husi ne’ebé, sé maka fó. Tanba ne’e, importante membru governu sira antes atu kaer pasta ruma.  

Rate this item
(1 Vote)

Independente Digital TV