Mate Restu ‘Hein’ Estadu Valoriza Featured

By Elsa Belinha Novembru 11, 2020 1090
Demonstrasaun 12 Nove,bru 1991. Foto: Arquivo Nasional Demonstrasaun 12 Nove,bru 1991. Foto: Arquivo Nasional

DILI: Mate Restu masakre Santa Kruz hamutuk na’in rihun 2 resin to’o ohin loron sei hein hela sira-nia direitu ba pensaun ne’ebé estadu Timor-Leste promete ona.

Tuir dadus husi Komite 12 Novembru, total mate restu ne’ebé dadauk ne’e rejistu hamutuk na’in 2.780.

Husi númeru ne’e, na’in 800 resin mak hetan ona pensaun no besik na’in rihun 2 mak seidauk hetan.

Prezidente Komite 12 de Novembru Gregorio Saldanha hatete, nia parte hato’o ona kestaun ne’e ba Ministru Asuntu Veteranus no sira promete iha tinan 2021 sei halo verifikasaun ba dadus ne’ebé iha nune’e sira bele hetan sira-nia direitu ba pensaun.

Juramentu

Molok ne’e, Komite 12 Novembru konsege rejistu ema na’in rihun 12 ne’ebé reklama an sai nu’udar mate restu 12 Novembru.

Maibé hafoin liu husi prosesu taes númeru ne’e konsege tuun to’o 2.856.

Husi númeru ne’e, na’in 76 mak entrega fila fali medulla no sira halo deklarasaun katak sira laiha direitu atu hetan ida ne’e.

Maneira ne’ebé K12N uza hodi taes mate restu sira, Grigorio hatete, mak liu husi juramentu.

Nia hatutan, juramentu ne’e ho objetivu atu bele identifika no taes didiak ema ne’ebé mak merese duni atu hetan direitu husi governu.

“Susesu balun husi juramentu ne’e mak balun entrega fali medulla, sira mós ho korajen hatete katak sira la merese hetan direitu ne’e,” dehan Grigorio iha Xanana Sport Center, Tersa (10/11).

Rate this item
(0 votes)

Independente Digital TV