Deputadu Bankada KHUNTO, Luis Roberto da Silva dehan, KHUNTO halo juramentu hemu ran atu hametin unidade nasionál no hamenus violensia iha Timor-Leste.

“Sira hakarak ami prontu atu halo jurmamentu, ida ne’e ami simu, ami la obriga sira, ami só haklaken de’it lalaok partidu KHUNTO, ema hotu-hotu bainhira interesante hakarak tama ba KHUNTO mak nia kriteria mak tenke juramentu,” dehan Deputadu Luis Roberto iha Parlamentu Nasionál (PN), Kuarta (01/07).

Nia dehan, juramentu hemu ran la’os foin mak akontese iha partidu KHUNTO, maibé akontese dezde tinan 1975 bainhira veteranu sira halo funu iha ai-laran.

Luis dehan, dezde 4 Juñu 2011 bainhira KHUNTO eziste iha Timor-Leste, hahú ho juramentu, ho hanoin atu oinsa bele akumula juventude iha Timor laran tomak, la haree ba rasa no kór.

“Sim, juramentu ami hemu ran, hemu ran hanesan iha pasadu 1975 (bainhira) Timor seidauk ukun aan mós ita-nia aman luta nain sira hemu ran, sira hemu ran katak hamutuk sai ema ida hodi defende ukun rasik aan,” dehan nia.

Luis hatete, juramentu ne’ebé KHUNTO halo laos obrigatoriu, maibé voluntariu ba Timor-oan ne’ebé hakarak tama KHUNTO.

“Ida ne’e hanesan kriteriu ida ba partidu KHUNTO, see mak hakarak tama ba Partidu KHUNTO tenke iha juramentu. Juramentu la signifika atu limite ema ida nia direitu, ne’e laiha, kuandu tempu ida mak nia sente dehan partidu ne’e la fó benefisiu ba nia, nia bele foti desizaun ba nia aan”.

“Ha’u hanoin hemu ran laiha impaktu, labele hanoin hemu ran ne’e, atu limita ema ida nia direitu, ne’e la’e, hemu ran atu dehan ita juramentu ona ne’e, hanesan sai inan ida, aman ida sai maun alin to’o mate ho ida mak hodi limita violensia ne’e,” nia esplika.

Ho nune’e, deputadu ne’e husu Partidu Politiku sira iha PN atu labele intepreta sala juramentu partidu KHUNTO nian.

“Juramentu ne’ebé Partidu KHUNTO kria la’os atu hamosu fali dezentendimentu ka halo problema ruma iha Timor, maibé halo juramentu ne’e atu evita rasismu hodi hakuak Timor-oan hotu-hotu sai inan ida, aman ida hodi partisipa dezenvolvimentu nasionál”.