Loron 8, Anin Sobu Uma 136 Featured

By Domingos Gomes Dezembru 10, 2020 751
Anin boot sobu lona iha loron komemorasaun proklamasaun independensia 28 Novembru 2020, iha Munisipiu Likisa. Anin boot sobu lona iha loron komemorasaun proklamasaun independensia 28 Novembru 2020, iha Munisipiu Likisa.

DILI: Iha inisiu fulan Dezembru, hahú husi 2 to’o 9, mosu dezastre naturais ne’ebé provoka husi udan no anin ho volume boot hodi rezulta uma hamutuk 135 mak hetan estragus.

Tuir dadus husi Sektretariu Estadu Protesaun Sivil (SEPS), iha loron ualu (8) nia laran uma 135 iha munisipiu haat mak hetan estragus tanba udan no anin boot.

Diretor Jeral Protesaun Sivil (DJPS), Ismael Babo hatete, iha 2 Dezembru akontese udan ho anin boot iha suku Beko, Postu Administrativu Suai, Munisipiu Kovalima, sobu uma 88.

Iha Suku Tapo-Memo, Postu Administrativu Maliana, Munisipiu Bobonaru, anin sobu eskola tekniku vokasional Maliavaka Yamatu Lequen.

Iha Ermera udan boot rezulta ai tohar no anin sobu uma komunidade hamutuk 47 no bele sai to’o 100 resin.

 “Ekipa protesaun sivil rejista uma komunidade 136 iha munisipiu haat, inklui uma eskola, hetan estragus total,” dehan nia ba jornalista sira iha edifisiu ministeriu finansa Aitarak-Laran, Dili, Kuarta (09/12).

Ba munisipiu Baukau, nia hatete, ekipa protesaun sivil kontinua halo verifikasaun hafoin hetan númeru sertu mak bele informa.

“Ami-nia Ekipa mós tuun dadaun ona hodi bele foti dadus, tanba ne’e ita espera loron aban ekipa sei update dadus ne’ebé akontese husi dezastre natural,” katak nia.

Entretantu, molok ne’e, iha 3 Dezembru 2020, tuir komunikadu ne’ebé publika iha pájina ofisiál  Facebook Diresaun Nasionál Meteorolojia no Jeofízika Timor-Leste (DNMG-TL), alerta ba komunidade ne´ebé mak hela iha rejiaun sira ne´ebé mensiona iha kraik atu toma atensaun ba udan akompaña ho anin boot no rai lakan.

Área sira ne´ebé mak eminente ba tempestade iha loron tomak, iha 3 Dezembru, hanesan: Bobonaro, Ermera (Railaco, Atsabe, Letefoho, Hatolia no Gleno), Ainaro (Hatu-Builico, Maubisse, no Hatu-Udo), Aileu, Manatuto (Laclubar, Soibada no Barique) no Manufahi (Turiscai, Same, Fatuberliu no Alas), Lautem (Iliomar), Viqueque (Dilor no Ossu), Manatuto (Laclubar no Soibada), Baucau (Venilale, Baguia) no inklui RAEOA (Pasabe no Oesilo).

Tuir modelu meteorolójiku, observa katak ba rejiaun-sira seluk ne’ebé la mensiona iha leten laiha risku ba tempestade, maibé iha tendénsia udan fraku ba moderadu.

“DNMG hakarak husu ba komunidade-sira ne´ebé hela iha rejiaun sira ne´ebé mensiona iha leten atu kontinua atensaun hodi halo movimentasaun iha lurón ba dezastre sira ne´ebé la espera,” informa komunikadu ne’e.

Rate this item
(0 votes)

Independente Digital TV