Kuarta, 30 Setembru 2020 | Login
Komandu F-FDTL, Lere Anan Timur Komandu F-FDTL, Lere Anan Timur

Lere: Membru Governu Balun Envolve Grupu Artemarsial Featured

DILI: Xefe Estadu Maior FALINTIL-Forsa Defeza Timor Leste (F-FDTL), Maijor Jeneral Lere Anan Timur husu ba governu atu buka hatene huun husi grupu artemarsial ne’ebé eziste iha Timor-Leste.

Tuir Maijen Lere, durante ne’e governu nonook de’it tanba membru governu balun envolve mós iha grupu artemarsial.

Atensaun públiku ba grupu artemarsial hahú maka’as liu tan, hafoin konfrontasaun iha Bebonuk ne’ebé rezulta joven ida, Tiago Inacio Coelho, mate.

Preokupasuan ba artemarsial ne’e mosu tanba tuir informasaun katak kazu tiru mate Tiago akontese bainhira polisia halo atuasaun ba konfrontu entre grupu artemarsial iha area Bebonuk.

“Ne’e mak PSHT ba halo juramentu iha Atambua ne’eba, ita tenke buka hatene, tanba saida mak sira ba halo juramentu iha ne’eba, nusa la halo juramentu iha Timor. Ne’e mak ha’u hanoin ita-nia Governu no Estadu tenke buka hatene,” dehan Lere ba Jornalista sira hafoin enkontru ho Prezidente Repúblika Taur Matan Ruak iha Palasiu Prezidente Nicolau Lobato Aitarak Laran-Dili, Kuarta (10/05).

Tuir Lere, governu mós presiza buka hatene see mak sai hanesan fundadór husi grupu artemasial sira hanesan Persaudaraan Setia Hati Terate (PSHT), Kmanek Oan Rai-Klaran (KOR-K), Ikatan Kera Sakti (IKS) no seluk tan.

Lere dehan, presiza buka tuir nia huun, atu bele hatene karik iha ema balun hatama sira-nia interese ba laran hodi kria instabilidade.

“Ne’e mak ha’u dehan Governu tenke haree ida ne’e, labele haree ita-nia membru Governu balun mós envolve buat sira (grupu artemarsial) ne’e sira mós nonook hela de’it,” dehan nia.

Maijen Lere dehan, konfrontasaun grupu artemarsial akontese bebeik ona no dala-ruma membru F-FDTL sira mós sai vitima.

“Ha’u hanoin katak kazu ne’e la’os foin akontese, akontese bebeik ona, agora ita tenke buka kazu nia huun,” Lere afirma.

Maske nune’e, Lere fó mós sujestaun ba governu atu di’ak liu formaliza ona artemarsial nune’e fasil atu kontrola.

 “Ha’u hatete ona, Governu tenke formaliza ona artemarsiais par bele kontrola,” deklara Lere.

 

Governu La Tolera tan

Iha fatin hanesan, Ministru Interior Longuinhos Monteiro hatete, governu sei la tolera sidadaun ne’ebé de’it mak uza atributu artemarsial hodi kria konflitu.

“Ba oin, ha’u sei repete tan, sei laiha tan toleransia ba see de’it mak envolve iha kazu artemarsiais, no liliu ba sira ne’ebé komete krime no lori atributu artemarsiais ninian,” dehan Longuinhos. 

Read 2277 times
Rate this item
(0 votes)

About Author