Durante kampaña eleitorál, komunidade sira sempre provoka malu hodi halo situasaun ne’e manas. Tanba ne’e, husu ba lider sira tenke organiza didi'ak militante no simpatizante sira atu labele kria konflitu iha kampaña.

“Husu ba ita nia polítiku sira, ita nia komunidade, ita nia juventude sira, primeiru tenke respeita ita nia instituisaun seguransa”, dehan Lere, iha Palasiu Prezidensiál, Ai-Tarak Laran, horisehik.

Tuir nia, kuandu la respeitu, instituisaun seguransa no defeza iha ona regra empeñamentu prosedimentu ba atuasaun ninian.

“Imi uza violénsia sem duvida imi mós tenke hein simu violénsia,” tenik nia.

Nia esplika, la’ós ona tempu atu hamaus malu. Ne’e duni, husu ba joven sira tenke kontribui ba estabilidade nasionál.

Tanba ne’e, Lere informa kuandu sé mak uza forsa, Estadu la duvida tenke responde ba saida mak sira halo. Kuandu uza forsa Instituisaun rua ne’e sei la hakru’uk.

Komandante F-FDTL hasai deklarasaun ne’e relasiona ho konflitu entre apoiante kandidatura Prezidente Repúblika, Francisco Guterres ‘Lu-Olo’ no apoiante António da Conceição ‘Kalohan’, iha Rai-Kotuk, Aldeia Terra Santa, iha loron primeiru kampaña eleisaun Prezidensiál, Sesta (3/3).