Lere Aviza Ba Tabeledór Xanana Featured

By Tomé Amado Dezembru 15, 2017 2110
Lere Lere

DILI: Prosesu formasaun Governu ne’ebé seidauk hetan nia-rohan, sai dependénsia ba lider istóriku sira, liuliu Prezidente partidu segundu mais votadu, CNRT, Xanana Gusmão.

Haree ba situasaun ne’e, Xefe Estadu Maiór Jenerál F-FDTL, Majór Jenerál Lere Anan Timur fó sai avizu ba ema sira ne’ebé gosta atu tabele ba Xanana Gusmão.

Nia dehan, ema sira ne’ebé ko'alia barak dala ruma mau-tabeledór sira. Tensaun polítiku ne'ebé la'o daudaun iha rai laran, hotu-hotu dun ba maun boot Xanana mak haruka no orienta.

“Ita labele sai oportunista! Labele sai tabeledór no labele sai aproveitadór”. tenik Lere, liu husi konferénsia imprensa, iha Kuartél Jerál PNTL, Kaikoli, horisehik.

Nia esplika, maun boot Xanana nu’udar lider karizmátiku no aman ba nasaun ninia komportamentu mak hanesan nune’e. Maibé hanesan oan, labele abuza konfiansa ne'ebé mai husi aman.

Nia (Xanana) iha li'ur la sala ida, tanba hatene katak sei iha lider barak iha Timor mak bele rezolve problema sira ne’e.

“Maun boot Ramos Horta, Mari, Naimori no maun boot Arão Noe bele rezolve problema sira ne’e”, tenik Lere.

Nia hatutan, dala ruma maun boot Xanana hanoin katak lider sira seluk bele rezolve problema sira ne’e.

“Ha’u uluk iha ai-laran iha hanoin hanesan nune’e, kuandu maun boot Xanana mak mate ita lakon duni funu”, dehan Lere.

Ikus mai inimigu sira kaer duni Xanana. Soldadu barak mak desmoralizadu. Barak mak tun ba rende. Maibé, depois ukun-aan tiha buat hotu la’o la di'ak ona lori maun boot Xanana nia naran, katak nia mak hateten, tenke hein nia mai.

Ne’e duni, Lere aviza ba povu tomak katak Xanana sei iha li'ur hala’o servisu, maibé ema hotu iha Timor tenke fó liman ba malu hodi komemora no festeja Natál no Tinan Foun ho hakmatek no haksolok.

Ema balun dehan Xanana lakohi mai ona. Lere dehan, la loos, tanba iha problema boot ida ne'ebé nia tenke rezolve hanesan fronteira marítima.

Rate this item
(0 votes)

Independente Digital TV