Adão konfesa katak nia servisu iha loja ida iha Oekuse no Loja na’in obriga nia tenke halo servisu todan hanesan hit simente no sasan todan seluk afeta ba nia kondisaun saude iha ona indikasaun moras pulmaun.

Tanba senti servisu ne’ebé nia halo iha loja ne’e todan, nia hili dalan mai Dili hodi buka fali servisu seluk. Maibé hafoin fulan ida, Adão enfrenta moras muta raan iha besik kafétaria ida iha Delta “Brother Coffe”.

Bainhira jornalista online INDEPENDENTE hasoru labarik Adão konta tuir katak nia inan-aman aseita mai Dili hodi buka osan, tanba ekonomia uma laran ameasadu.

"Ha’u mai iha Dili tanba hau nia inan-aman mos hakarak, antes ne’e ha’u iskola hela iha SMP EBC Benafi Oekusi maibé tanba situasaun ekonomia uma laran ha’u tenke para eskola hodi buka servisu atu nunee suporta inan-aman nia ekonomia maski servisu todan mos tenke halo iha momentu neba,"dehan Adão iha Ponte Komoro II iha Timor Blok nia oin Brother Coffee ba Jornal online Independente ohin

Adão enfrenta moras ne’e tanba tuir nia katak kauza husi hit sasan todan hanesan besi, sumente ba kareta kaminota laran.

Nia dehan, servisu iha loja ne’e kuaze fulan tolu tanba ne’e  nia rasik para servisu no abondana nia eskola mai ho ro nakroma.

"Ha’u iha Dili besik fulan ida ona baihira ha’u too iha Dili h’au laiha familia maibé ho h’au nia aten-brani tun husi ro nakroma lao deit, lahatene atu ba nebe maibé ha’u konsege hetan tulun husi ema oekusi balun no agora dadaun ha’u hela ho sira iha Delta,”nia dehan, akompana tradusaun husi nia maluk Oekuse-oan.

Husi nia problema saúde, nia hakarak tebes atu konsulta saúde maibé la konsege tanba seidauk domina Dili.  Tanba ne‘e nia tenta lao halimar mai iha Brother Coffee, maibé derepente nia enfrenta moras muta raan.

Entretantu Xefe Ekipa KDL hamutuk ho jornalista Independente too kedas iha Coffee Brother akompana ho tradutor Baikeno husi KDL hodi konsola labarik ne’e.

Komisaun Direitus Labarik (KDL) konsege hasoru labarik Adão ne’e iha Coffee Brother hodi fó konsellu aproximasaun hodi foti labarik ne’e ba uma mahon hodi kontinua tau matan ba nia saúde no nia nesesidade seluk.

" Ami mai hodi buka tuir labarik Adão husi Oekuse ne tanba hetan orientasaun  husi Komisaria KDL nian,graca de Deus ita hetan duni labarik ne’e iha fatin ida ne’e,"dehan Xefe ekipa KDL, Suzi Sarmento iha Coffee Brother Delta 4.

Iha biban ne’e, baihira Ekipa KDL aproxima labarik ne’e atu ba uma mahon ida iha Dili ne’ebé KDL prepara, labarik husi inisiu lakohi maibé ho konversa ne’ebé naruk  ekipa KDL konsege lori labarik ne’e ba Sentru Saúde Comoro hodi konsulta nia kondisaun saúde no kontinua lori nia ba uma mahon ida iha Dili hodi tau-matan ba nia saúde no nia nesesidade seluk.

KDL hateten, labarik ne’e seidauk bele fila ba Oekuse tanba Timor-Leste sei enfrenta mós moras Covid-19, tanba ne’e  lori ba uluk uma mahon.

KDL ho RAEOA oras ne’e dadaun halo preparasaun makaas hodi reintegra kuaze labarik na’in 300 ba sira nia familia iha Oekuse ho dignu.