Print this page

Komandu Laiha Kontrolu Ba Kilat iha PNTL Featured

By Domingos Gomes Maiu 08, 2020 3069
Fundasaun MAHEIN Fundasaun MAHEIN

DILI: Organizasaun Naun Governamentál (ONG) Fundasaun Mahein (FM) konsidera Komandu Jerál Polisia Nasionál Timor Leste (PNTL) laiha kontrolu ba kilat ne’ebé membru polisia utiliza fora husi oras servisu.

Diretór Ezekutivu FM, João Almeida hatete, kilat sira iha instituisaun PNTL ne’e komandu jerál deskontroladu, liuliu utilizasaun kilat fora husi oras servisu, tanba ne’e Komandu Jerál PNTL tenke hola medida hasoru situasaun sira ne’ebé akontese.

Kazu Maubara liga ho kazu Kulu-Hun, iha tinan 2018, fó ona alerta katak, sera ke kazu Kulu-Hun ne’e ikun ona, tanba iha momentu ne’ebá kestiona ba asuntu ne’e.

“Iha momentu ne'ebá ami husu kazu Kulu-hun ne’e ikus ona, ka sei iha tan kazu kilat husi PNTL. Maibé agora akontese membru polisia ida uza kilat fora husi oras servisu ho sivíl, tiru kanek vítima iha Maubara. Ne’e signifika Komandu Jerál PNTL deskontroladu ba membru polisia uza kilat,” dehan Almeida via telefone, horisehik.

Nia dehan, maski iha momentu ne’ebé komandu jerál klareza PNTL iha regra uza arma no oinsá iha mekanizmu atu bele asesu ba kilat no iha regra oinsá mak membru polisia atu utiliza kilat, maibé realidade la implementa.

Tanba ne’e, Komandu Jerál PNTL hanesan lider iha instituisaun PNTL seidauk iha kontrolu ne’ebé rigór no la sériu hodi trata asuntu ne’e no povu kontinua vítima ba iha kilat aumenta, pior liu uza kilat hodi hakanek povu no hamate povu fora husi oras servisu.

Nia afirma, kazu Maubara, Komandu Jerál PNTL tenke responsabiliza membru ne’ebé komete no mós responsabiliza hodi hadi’a regra uza kilat tuir prosedimentu no mekanizmu tenke ho rigór la’ós membru ida uza kilat uza ba problema ne’ebé partikulár.

“Komandu labele ko’alia slogan mak barak liu nunka fó asuntu ida ne’ebé konkreta kona-ba regra uza kilat ho prosedimentu ida, nune’e ita-nia povu labele sai vítima ba indifisiensia Komandu Jerál PNTL,” dehan Almeida.

Nia esplika, membru polisia kuandu asesu ba uza kilat tenke iha regra tuir dekretu lei 43/2011 kona-ba rejime jurídiku uza forsa, iha ne’e iha laran artigu por artigu kompletu kona-ba uza kilat, maibé problema saida mak labele aplika regra atu membru polisia sira bele kumpre.

Rate this item
(0 votes)

Related items