Kazu UNPAZ, Polisia Detein Estudante 16, Joven 5 Featured

By Ekipa INDEPENDENTE Juñu 23, 2020 2291
Familia matebian lori mate isin ba rai iha UNPAZ. Foto Joenaca da Conceicao/INDEPENDENTE Familia matebian lori mate isin ba rai iha UNPAZ. Foto Joenaca da Conceicao/INDEPENDENTE

DILI: Komando Polisia Nasionál Timor-Leste Munisipiu Dili detein suspeitu 21 ba kazu krime ne’ebé akontese iha Universidade da Paz (UNPAZ) hodi rezulta ema na’in ida mate no na’in 8 hetan kanek.

Iha Domingu (21/06) maizumenus tuku 01.30 madrugada, joven ida ho naran Henrique Maia Soares (21) mate hafoin monu tuun husi andar UNPAZ ne’ebé ho as kuaze metru 12. Hafoin akontesimentu ne’e, komunidade sira ne’ebé hela besik area refere halo asaltu ba estudante UNPAZ ne’ebé rezulta estudante na’in 8 hetan kanek.

Komandante PNTL Munisipiu Dili, Superentendente Xefe Armando Monteiro informa, PNTL Dili detein ona estudante UNPAZ na’in 16 no joven na’in 5.

Estudante na’in 16 ne’ebé sai suspeitu ho insial RJCP, ZRA, ESG, CDAG, FC, DI, APFT, HMA, AMU, MM, LDSDS, JPJ, AJP, JSJ, JCM, no FAL, no joven sira ne’ebé detein ho inisial MS, JS, FM, ACE no MM.

Komandante ne’e dehan, PNTL rekolla ona evidensia balun husi fatin akontesimentu hanesan morizada ida, alku, martelu no besi kanu.

“Iha provas no sasin (ne’ebé) la’o hamutuk mós ho matebian mai iha Universidade, tuir informasaun ne’ebé ita kolekta, matebian sai husi uma tuku 12:00 kalan, hafoin akontesimentu ida ne’e mak inan aman mós hakfodak, oan mate iha ne’ebá,” informa Armando iha Komando PNTL Dili, Segunda (22/06).

Kona-ba kronolojia akontesimentu, Komandante ne’e la esplika klaru, maibé hatete de’it katak tuir infomasaun matebian ba fatin estajiu UNPAZ hamutuk ho suspeitu balun iha tuku 12 kalan no iha tuku 2 madrugada matebian monu husi andar leten.

“Akontesimentu iha oras tuku 2 madrugada, ne’e oras ema hotu deskansa, ita iha inan-aman, kultura, lisan, katak iha fatin ne’ebé mak deskansa, agora ba iha ne’ebá inan-aman, familia, hatene ka la’e? objetivu saida? la’o ho see?, tanba ne’e mak dala ruma ita koalia hafoin akontesimentu ida ita fó argumentu, mais orsida provas mak sei determina,” dehan nia.

Tan ne’e, nia husu atu fó tempu ba ba investigadór PNTL atu kolekta nafatin informasaun husi parte hotu-hotu hodi bele finaliza no relata ba Ministériu Públiku.

“Agora dadaun ita suspeita hela, orsida finalidade ita sei iha prosesu investigasaun sei aprezenta ba Ministeriu Públiku.”

Rate this item
(0 votes)

Independente Digital TV