Kazu Positivu Covid-19 Aumenta Na’in Tolu Featured

By Husi: Ekipa Independente Fevereiru 04, 2021 556
Koordenador Pilar III, Josefina Clarinha Joao, anunsia atualizasaun Covid-19, ba loron ohin, kinta (04/02), foto: Independente Koordenador Pilar III, Josefina Clarinha Joao, anunsia atualizasaun Covid-19, ba loron ohin, kinta (04/02), foto: Independente

DILI: Ministeriu Saude (MS) liu husi kordenasaun Pilar III, detekta tan sidadaun na’in tolu konfirmadu positivu Covid-19.
Sidadaun na’in tolu ne’e kompostu husi mane na’in rua no feto na’in ida.


Tuir Kordenadora Pilar III, Josefina Clarinha Joào informa, ohin loron 4 fulan-fevereiru komisaun Nasional rezista tan kazu konfirmadu positivu Covid-19 na’in tolu, sidadaun na’in tolu ne’e mane ida ho idade 22, mane ida seluk ho idade 29 no feto ho idade 21.
Sidadaun na’in tolu ne’e laiha simtomas, entre sira na’in tolu ne’e, iha na’in ida sidadaun bai-bain no na’in rua seluk hanesan estudante.
“ Sidadaun na’in tolu ne’e, na’in rua seluk horkalan ekipa jestaun husi pilar VII evakua ona ba iha sala izolamentu Vera Cruz, no sidadaun ida fali ekipa sira oras ne’e dadaun prepara ona atu transporta mai iha sala izolamentu Vera Cruz,”dehan nia liu husi konferensia Imprensa ba jornalista,(04/02)
Nia esplika, pasiente feto ho idadae 21 ne’e, antes nia hela iha konventu ida iha kupang Indonézia Osidental, no mane ho idade 22 ne’e nu’udar estudante iha universidade iha Bali.
Sidadaun sira ne’e mai husi Indonézia husi provinsia ne’ebé la hanesan, iha loron 20 fulan janeiru 2021 no tama mai Timor-Leste liu husi pontu entrada Batugade hamutuk ho pasajeiru na’in 118.
Enkuantu, sidadaun sira ne’e kumpri kuarantena obrigatoriu iha Ótel Novu Horizonte.
“ Ita nia ekipa vizilansia epidemolojika ba halo teste swab dahuluk iha loron 21 janeiru ho rezultadu teste negativu, teste daruak foti iha loron 1 fevereiru no iha loron 3 fevereiru rezultadu laboratóriu hatudu katak, sidadaun na’in rua ne’e positivu Covid-19,"nia dehan
Nune’e sidadaun mane ida fali ho idade 29 ne’e, nia sai husi Salele, Munisipiu Kovalima ba Atambua Indonézia liu husi dalan illegal iha loon 22 janeiru no nia deside fila mai Timor-Leste liu husi Malaka no tama mai nafatin liu husi dalan ilegál parte Salele nian.
No iha loron ne’e kedan, Polisia Nasional Timor-Leste (PNTL) liu husi Unidade Patrullamente Fronteira (UPF) detein no transporta hodi submete ba iha kuarantena.
“ Ekipa vizilansia ba foti amostra swab hetan rezultadu teste hatudu katak, sidadaun ne’e positivu Covid-19.”
Entretantu tuir dadus, kazu foun aumenta na’in tolu, kazu komulativu 80, atual baixa sa’e ba 27, iha Dili 26 no RAEOA na’in 1.

Rate this item
(0 votes)

Independente Digital TV