Print this page
FOTO: Espesial FOTO: Espesial

Kalbuadi Fila ba Deputadu, Opozisaun Konsidera PN Hanesan Abrigu Featured

DILI:Bankada Opozisaun sente hakfodak ho prezensa Sekretáriu Jerál Partidu Konsellu Nasionál Rekonstrusaun Komorense (CNRT), Francisco Kalbuadi Lay ne’ebé derrepente fila hikas nu'udar Deputadu, iha segunda (25/2).

Opozisaun sente hakfodak tanba pozisaun Kalbuadi nu'udar deputadu durante ne’e substitui husi Deputada Virginha Ana Belo. Kalbuadi naran tama iha lista pendente kandidatu membru VIII Governu Konstitusionál.

“Ami sente Parlamentu Nasionál sai hanesan fali abrigu ba ema kriminozu sira atu subar iha ne’e,”dehan Deputadu Bankada FRETILIN, José Agustino Somotxo iha nia intervensaun, iha PN horisehik.

Ministériu Públiku notifika Kalbuadi Lay dala tolu ona atu ba presta deklarasaun iha Ministériu Públiku relasiona ho kazu krime brankamentu kapitál.

Tuir Somotxo hatete, durante fulan rua nia laran kazu Sekretáriu Jerál Partidu CNRT nian sai polémika boot iha públiku maibé derrepente mosu fali iha ne’e (PN).

Tanba ne’e Somocho husu ba Aliansa Maioria Parlamentár atu esplika ba públiku bele hatene situasaun ne’e.

 Kalbuadi Prontu Presta Deklarasaun iha MP

Hataan ba kestaun ne’e tuir Francisco Kalbuadi Lay hatete, nia retoma fali pozisaun nu'udar deputadu tanba lei fó dalan.

“Ha’u mai retoma fali pozisaun hanesan deputadu tanba lei mak fó dalan, ha’u mós hanesan lista kandidatura númeru haat iha AMP nian, ne’ebé eleitu husi povu rasik,”Kalbuadi responde preokupasaun opozisaun sira iha PN horisehik.

Nia rekoñese katak iha fulan ida liu ba simu duni karta notifikasaun husi Ministériu Públiku maibé iha momentu ne'ebá responde notifikasaun ne’e liu husi karta hodi halo klarifikasaun katak nia (kalbuady) sei trata hela asuntu família no ba hala’o operasaun iha rai li'ur.

Kalbuady klarifika, bain hira halo hela tratamentu iha rai liu rona katak notifikasaun foun ida dirije ba  fali Presidente Partidu CNRT Xanana Gusmão husu atu mai kumpre justisa momentu ne’e la disponivel tanba kondisaun saúde la permite.

Ohin (horisehik) prezensa iha uma fukun, Kalbuadi hatete la'ós atu mai subar iha imunidade nia okos, no prontu atu koopera ho setór justisa hodi ba halo presta deklarasaun iha MP.

“Ha’u nia prezensa ohin atan ha’u husu deskulpa karik fulan ida nia laran halo polémika, nune’e ohin ha’u fila mai atu justifika no garantia hanesan sidadaun nia devér tanba ita hotu iha lei nia okos,”dehan eis Ministru Turizmu ne’e.

Hanesan sidadaun ida iha direitu no devér, no lei mós próteze ninia sidadaun sira, nia prezensa iha PN la'ós atu garantia ba imunidade hodi lakohi koopera ho Ministériu Públiku.

“Ha’u prontu koopera ho justisa hodi presta deklarasaun ba futuru mak haree sala, sala no loos, loos tanba justisa ne’e ba ema hotu,”nia garante sei presta deklarasaun iha Ministériu Públiku.

Sekretáriu Jerál Partidu Konsellu Nasionál Rekonstrusaun Timorénsia (CNRT) kinta ne’e retoma pozisaun nu'udar deputadu Parlamentu Nasionál no nia promete sei koopera ho setór Justisa liu-liu Ministériu Públiku.

Deputadu Kalbuadi tama iha lista númeru kandidatura dahaat husi AMP iha Parlamentu Nasionál no asume kargu hanesan Presidente komisaun

Read 993 times Last modified on Domingu, 10 Marsu 2019 18:21
Rate this item
(0 votes)

Related items