Inisiu Novembru, Kandidatu Administradór Hetan Apresiasaun husi KKM Featured

By Saturnina da costa Outubru 22, 2020 3257
Ministru Administrasaun Estatal (MAE) Miguel Pereira de Carvallho. Ministru Administrasaun Estatal (MAE) Miguel Pereira de Carvallho.

DILI: Tuir planu, iha inisiu fulan Novembru oin mai, Ministériu Administrasaun Estatal (MAE) sei aprezenta kandidatu administradór no prezidente autoridade husi Munisipiu Baukau, Lautem no Vikeke ne’ebé liu ona teste ba grupu Tekniku Interministerial no Konsellu Konsultivu Munisipal (KKM) hodi hetan apresiasaun.

Tuir rezultadu ne’ebé Ministériu Administrasaun Estatal (MAE) públika no taka ona iha kada munisipiu, iha Tersa (07/10), husi total kandidatu na’in 24 ne’ebé tuir ezame, kandidatu na’in 9 de’it mak konsege pasa tanba hetan valor ne’ebé boot liu.

Ministru Administrasaun Estatal (MAE) Miguel Pereira de Carvallho hatete, ekipa juri sei lori lista kandidatu ne’ebé pasa ona ba grupu traballu tekniku interministerial ba desentralizasaun nian no ba munisipiu atu bele deskuti ho Konsellu Konsultivu Munisipal hodi hetan apresiasaun.

Hafoin hetan apresiasaun, nia dehan, Ministru Miguel sei lori lista kandidatu ba Konsellu Ministru hodi deside.

"Ha’u rasik hanesan Ministru Estatal sei lori naran no proposta hirak ne’e mai iha konsellu ministru atu halo deliberasaun hodi aprova kandidatu sira ne’ebé mak atu sai Administrador no Prezidente Autoridade no iha tempu hanesan mós sei ezonera sira ne’ebé mak hala’o hela funsaun," dehan Miguel iha palasiu governu, Kuarta (21/10).

Entretantu, Konsellu Konsultivu Munisipal kompostu husi Administradór ka Prezidente Autoridade, Sekretariu, Xefe Suku, no grupu partidus politikus ne’ebé iha asunte iha Parlamentu Nasionál.

Entretantu, husi total kandidatu na’in 5 husi munisipiu Baukau ne’ebé tuir ezame, kandidatu na’in 4 mak konsege pasa no na’in ida la konsege pasa.

Kandidatu ne’ebé pasa mak Olivio Freitas ho valor 17.6, Domingos Savio Cabral ho valor 17.2, Maria Celestina Viegas ho valor 12, no Secundino Freitas Moreira ho valor 11.

Ba kandidatu husi munisipiu Lautem, husi na’in 9 ne’ebé tuir ezame, na’in 2 de’it mak konsege pasa no na’in 7 seluk la konsege pasa, inklui eis deputadu Fretilin Aurelio Freitas Ribeiro.

Kandidatu ne’ebé pasa mak Domingos Savio ho valor 15.4 no Jacinto da Costa ho valor 14.2.

Kandidatu administradór Munisipiu Vikeke, husi na’in 10 ne’ebé tuir teste, na’in 7 mak la pasa, na’in ida falta iha ezame, no na’in 3 de’it mak pasa.

Kandidatu ne’ebé pasa mak Januario Soares ho valor 13.6, Elizeu Angelo da Costa Soares ho valor 13.2, no Francisco da Silva Guterres ho valor 12.6.

Rate this item
(0 votes)

Independente Digital TV