Sábadu, 19 Setembru 2020 | Login
Horta. Horta.

Horta: “Ha’u Seidauk Asina Petisaun Husi RNDJ-KRDTL” Featured

DILI: Laureadu Nobel da Pas José Ramos Horta hatete, bainhira nia ba hasoru-malu ho ekipa RNDJ-KRDTL atu rona sira, sira husu atu Horta asina petisaun, maibé Horta rekuza ho razaun katak nia presiza lee lai petisaun refere molok foti desizaun.

“Ha’u hatete ba sira, ha’u la asina petisaun arbiru. Deklarasaun, petisaun barak iha mundu ne’e ema haruka ba ha’u, ha’u estuda didi’ak, balun ha’u la asina, tanba, ha’u hatete mós ba sira ‘ha’u la koñese asuntu ne’e ho didi’ak, ha’u nunka koalia kona-ba asuntu ida ne’e, derrepente ha’u asina, laiha kredibilidade, tanba ema barak hatene ha’u nunka liga ba ida ne’e’, entaun ha’u husu deskulpa ba sira,” dehan Horta iha nia rezidensia Metiaut, Kuarta (06/08).

Eis Presidente ne’e dehan, nia foin simu dokumentus petisaun nian via email no whatsapp iha Kuarta (05/08), no nia seidauk lee.

“Mezmu ke ha’u lee i ha’u konkorda sira-nia argumentu, la signifika ha’u sei asina, tanba sa? Primeiru, aktus prezidente halo ke ita konsidera illegal ka ilejitimu ka inkonstitusional ne’e, ha’u la hatene loos duni ka lae, inskonstitusional duni ka lae, tanba interpretasaun juridiku ne’e oioin. Prezidente iha kompetensia ka laiha kompetensia tuir konstituisau ne’e depdende ona idaidak nia interpretasaun. Ita koalia ho konstitusionalista balun sira hatete ‘lae, prezidente labele halo nune’e’, konstitusionalista seluk hatete ‘lae, nia bele’.”

Razaun seluk, Horta dehan, maske PR Lu Olo halo sala karik, nia la hatene ida ne’e bele sai materia ne’ebé sufisiente atu ezije PR ninia demisaun.

“Klaru, ema barak bele halo (ezije PR rezigna an), nu’udar sidadaun. Mais, ha’u nu’udar eis Xefe Estadu ida, sidadaun ida ho kakutak uitoan, ha’u sei lee lai sira-nia dokumentus, mais atu asina ho sira, ne’e ha’u sei hanoin dala 10 tan,” deklara Horta.

Horta hatete tan, hafoin simu dokumentu petisaun, nia sei lee dokumentu refere, maibé laiha garante katak nia sei asina.

Entretantu, molok ne’e, Prezidente Partidu Trabalhista no Portavoz RNDJ-KRDTL, Angela Freitas deklara katak eis Prezidente Repúblika no Laureadu Nobel da Pas José Ramos Horta asina ona petisaun hodi ezije Prezidente Repúblika Francisco Guterres Lú Olo rezigna an.

Angela dehan, Horta nia asinatura ne’e fó iha loron ne’ebé bainhira nia mai vizita sede nasional Rezistensia Nasionál Defende Justisa no Konstituisaun RDTL iha formoza iha Kinta (23/07).

Angela hatete, Horta rasik konkorda ho asaun ne’ebé RNDJ-KRDTL hala’o daudauk, no fó ona ninia assinatura ne’ebé sei tau hamutuk ho karta petisaun.

“Nia rasik konkorda no assinatura ne’ebé ita tau iha resepsaun ne’e automatikamente sei hatama mós ba iha petisaun ne’e, Dotor Ramos Horta rasik mós asina tiha ona. Karta petisaun ne’e pengantar de’it, maibé assinatura ne’ebé ita rekolla ne’e nia (Horta) mós termasauk asina tiha ona, tanba ita tau ona iha resepsaun no kada ema tama mai asina kedas,” dehan Angela ba jornalista INDEPENDENTE iha Sede Nasional RNDJ-KRDTL, Bairo Formoza, Kuarta (29/07).

Angela hatete, prezensa Horta iha Sede Nasional RNDJ-KRDTL nu’udar sinal pozitivu ida hodi enkoraza RNDJ-KRDTL atu hatur presedente ida  ne’ebé di’ak ba Timor-Leste nune’e jerasaun foun bele la’o tuir regras konstituisaun ninian.

“Nia rasik verbalmente aseita ona, no ha’u fiar nia sei la rezeita, bainhira hatama karta petisaun ba PR, karik nia (Horta) iha ne’e, kalru katak nia sei partisipa mós tanba iha konferensia imprensa dala hira ne’e nia sempre akompaña,” dehan Angela.

Read 610 times
Rate this item
(0 votes)