Tersa, 22 Setembru 2020 | Login
Bankada tolu, FRETILIN, PLP, KHUNTO hala'o hela eleisaun ba meza PPN, tersa (19/5). Foto INDEPENDENTE Bankada tolu, FRETILIN, PLP, KHUNTO hala'o hela eleisaun ba meza PPN, tersa (19/5). Foto INDEPENDENTE

Hafoin Hatun PPN Arão, Sei Hatun Tan Sekretária no Prezidente Komisaun Featured

DILI:Hafoin hatun obrigatóriu Presidente Parlamentu Nasionál ba V Legislativa, Arão Noe de Jesus, tuir planu Bankada tolu, FRETILIN, PLP no KHUNTO atu hatun tan Sekretária Meza Parlamentu Nasionál, Vise Sekretariu no Prezidente Komisaun Espesializada sira.

Presidente Parlamentu Nasionál eleitu, Aniceto Guterres hatete, atu halo alterasaun ba meza parlamentár sira depende ba Bankada Parlamentáres  sira, PLP, KHUNTO, FRETILIN.

“Ha’u hatene intedimentu entre partidu tolu ne’e, Vise Prezidente na’in rua sei mantein, agora atu halo alterasaun ba sekretária no vise sekretária,” dehan Aniceto, iha Parlamentu Nasionál, Sesta (22/05).

Nia dehan, tau tiha ajenda, maibé depende bankada tolu nian, parese prosimu semana bele halo.

Tanba agora mosu ona konfigurasaun politika foun, maioria ida bele iha intendimentu halo alterasaun ba meza komisaun sira ne’ebé agora eziste.

“Bele akontese depende intendimentu maioria parlamentár, se iha ona pedidu komisaun ida-idak bele reuniaun halo alterasaun ba sira nia meza, tanba iha komisaun iha reprzentasaun bankada iha hotu,”dehan nia.

Entrentantu Sekretaria Meza,  Maria Terezinha  Viegas da Silva (CNRT) no Vise-Meza Isabel Maria Freitas Ximenes (UDT/FM).

Nune’e Prezidente Komisaun Espesializada mak hanesan, Prezidente Komisaun A ( Konstitusaun  no Justisa), Deputada Carmelita Caetano Moniz (CNRT), Prezidente Komisaun B (Negosiu Estranjeiru, Defeza no Seguransa), Deputadu Aderito Hugo da Costa (CNRT), Prezidente Komisaun C  (Finansas Públikas), Deputada Maria Fernada Lay (CNRT), Prezidente Komisaun D, (Ekonomia no Dezenvolvimentu), Deputada Virgina Ana Belo (CNRT), Prezidente Komisaun E (Infra-Estrutura), Deputadu Abel Pires  da Silva (PLP), Prezidente Komisaun F, (Saúde, Seguransa Sosiais no Igualidade Jeneru) Deputada Maria Gurrumali Barreto (CNRT), Prezidente Interinu Komisaun G, (Edukasaun, Juventude, Kultura no Sidadania), Deputadu Sabino Soares “Guntur” (PLP).

Bankada tolu, FRETILIN, PLP no KHUNTO hatun obrigatoriu Presidente Parlamentu Nasionál Arão Noe de Jesus, loron tersa (19/5), liu husi votasaun urjente ho votus afavor 40, abstensaun 0, no kontra 0.

Read 3555 times
Rate this item
(0 votes)