Governu sei “Tebe sai” Kalbuady husi Komisaun Expo Dubai Featured

By Pedro Alves Agostu 06, 2020 1737
Kalbuadi Lay. Kalbuadi Lay.

DILI: Governu konstitusional daualu ne’ebé lidera husi Primeiru Ministru Taur Matan Ruak durante ne’e hein hela karta rezignasaun husi Francisco Kalbuadi Lay nu’udar Prezidente Komisaun ba Expo Dubai, maibé tanba Kalbuadi seidauk aprezenta, governu deside atu troka.

Ministru Turizmu, Komersiu no Industria José Lucas do Carmo da Silva informa, durante ne’e governu hein hela karta rezignasaun husi Prezidente Komisaun Expo Dubai Francisco Kalbuadi Lay.

Maibé, nia hatutan, tanba to’o ohin loron Kalbuadi seidauk aprezenta karta rezignasaun, nune’e iha tempu badak Konsellu Ministru sei foti desizaun hodi hasai Kalbuadi no troka fali ho ema seluk.

“Durante ne’e mós governu husu atu señor Kalbuadi Lay hatama karta rezignasaun ruma, maibé hein to’o ohin loron laiha, entaun lideransa ho Primeiru Ministru sei hasai (Kalbuadi) liu reuniaun konselu ministru hodi delega fali lideransa foun,” informa Ministru Jose Lucas hafoin hasoru-malu ho PM Taur iha Palasiu Governu, Kuarta (05/08).

Iha 12 Juñu 2019, Konsellu Ministrus aprova despaxu husi Primeiru Ministru ne’ebé nomeia Francisco Kalbuady Lay hanesan Autoridade Nasionál ba Expo 2020 Dubai, ne’ebé mak sei sai nu’udar responsavel atu harii no nomeia komisaun organizadora ida hodi reprezenta Timor-Leste iha Expo 2020 nian.

Entretantu, expo ne’ebé tuir planu realiza iha Dubai, Emiradus Árabes Unidus, husi 20 Outubru 2020 to’o 10 Abríl 2021, tenke adia fali ba tinan 2021 relasiona ho pandemia Covid-19 ne’ebé afeita maka’as ba nasaun hotu-hotu iha mundu.

Rate this item
(0 votes)

Independente Digital TV