Print this page

Governu mak Husik Ema Okupa Rai Estadu Featured

By Ekipa INDEPENDENTE Outubru 09, 2019 3508
Prokuradór Jerál Repúblika (PJR) José da Costa Ximenes Prokuradór Jerál Repúblika (PJR) José da Costa Ximenes

DILI: Komunidade balun kontinua okupa rai estadu maibé governu husik de’it no ikus mai bainhira governu hakarak hasai sira, governu tenke hasai osan hodi selu indinimizasaun.

Prokuradór Jerál Repúblika (PJR) José da Costa Ximenes hatete, durante ne’e bainhira komunidade balun ba okupa rai estadu, parte Teras no Propriedade no Ministériu Obras Públika (MOP) husik de’it.

“Agora ema mai halo (uma iha rai estadu, estadu la foti dezisaun ruma, to’o abanbainrua hasai mak fó osan, maibé bainhira halo iha ne’ebá laiha ema ruma husi MOP ka Land Property ba fó hatene dehan rai ne’e estadu nian,” dehan PJR José hafoin enkontru ho Prezidente Repúblika Francisco Guterres Lu Olo iha palasiu Prezidensial, Segunda (07/10).

PJR fó ezemplu kona-ba komunidade sira ne’ebé harii uma iha parte tasi ibun besik Hotel Arbiru.

“Lalika ba fatin dook, hanesan iha Hotel Arbiru ne’ebá ema halo uma arbiru de’it, rai ne’ebá rai estadu ka privadu nian?. 100 metru husi tasi-ibun ne’e devia estadu nian,” dehan nia.

Konstrusaun iha Lagoa Tasi Tolu Kontinua

Entretantu, komunidade balun ne’ebé okupa area protejidu Tasi Tolu kontinua halo kontrusaun ba uma foun, maske governu aviza ona atu para.

Tuir observasaun husi jornalista INDEPENDENTE iha area Lagoa Tasi Tolu, prosesu harii uma la’o namanas hela no uma balun besik atu remata ona.

Ba kestaun ne’e, Diretor Nasional Terras Propriedade no Servisu Kadastrais, Ministériu Justisa, Julio da Conceição Tilman hatete, sedu ka tarde governu sei hasai sira.

“Governu laiha autorizasaun ofisial ruma ba komunidade atu halo uma iha Lagoa Tasi Tolu, maibé sira kontinua halo uma, sedu ka tarde ami sei hasai sira,” informa Julio ba jornalista sira, Tersa (08/10).

Nia dehan, governu fó ona samada ba okupante foun sira, maibé sira ulun toos no kontinua harii uma.

“Ita fó ona samada ba sira, maibé sira ulun toos kontinua halo (uma) mak loron ida tenke hasai sira, tanba buat ne’ebé estadu nian, ne’e estadu mak bele iha poder boot liu hodi regulariza, no povu ida laiha direitu foti desizaun rasik atu estadu tuir nia,” dehan Julio.

Entretantu, Xefe Departamentu Jestaun Merkadu, Ijene no Ordenamentu Públiku Guarda Munisipal Dili, Berta Santa G. Vieira hatete, nia parte sei hein orientasaun husi liña ministerial hodi ba sobu uma foun iha Lagoa Tasi Tolu.

“Ami hein orden husi leten bainhira mak atu ba sobu uma iha area protejidu Tasi-Tolu, ami prontu kualker oras, tanba ne’e to’o agora ami hein hela maibé orden seidauk tuun,” dehan Berta.

Molok ne’e, tuir informasaun, iha Sabadu no Domingu, okupante sira serbisu duni tempu ho intensaun atu bele remata lalais prosesu konstrusaun molok autoridade kompetente realiza planu atu hasai sira.

Tuir informasaun husi komunidade balun iha Tasi Tolu, uma foun hirak ne’ebé besik remata nu’udar propriedade husi pesoal polisia balun.

“Baibain sira halo uma ne’e karreta polisia mak mai para iha ne’e. Ha’u la hatene governu brani hasai sira ka lae,” dehan komunidade ne’ebé husu atu la públika ninia identidade.

Iha Kinta (03/10), ekipa Tékniku área Habitasaun no Planu Urbanu, Ministériu Obras Públikas (MOP) halo observasaun direita ba okupante foun iha área protezidu, Lagoa, Tasi-Tolu.

Iha sira-nia observasaun identifika katak okupante hahú halo uma iha rai estadu nian.

“Konstrusaun la halo iha loron maibé barak halo serbisu iha óras kalan nian,” informa MOP liu husi pajina ofisial MOP iha media sosial Facebook.

Tuir informasaun husi komunidade, media MOP hatete, okupante sira iha karta deklarasaun husi Xefe Suku Komor, Eurico Guterres, atu okupa rai refere.

Maibé, parte Xefe Suku informa katak karta deklarasaun ne'ebé autoridade lokál Suku Komoro hasai la autoriza komunidade atu okupa rai refere maibé hanesan pedidu ba Ministériu Justisa (MJ), liu-liu Diresaun Teras no Propriedade, atu autoriza komunidade hela iha rai estadu.

“Nune'e MOP liu husi Diresaun Habitasaun no Planu Urbanu hamutuk ho Diresaun Teras no Propriedade hamutuk ho autoridade lokál sei hasai obrigatóriu komunidade ne'ebé okupa área protezidu sira ho ilegalmente,” deklara media MOP.

Tuir observasaun tékniku sira nian nota katak konstrusaun uma sira la tuir regra konstrusaun sei kria bairu de latas.

“Uma sira ne'e foin mak hada bloku, nune'e husu ba okupantes atu labele kontinua konstrusaun refere, tanba Governu sei hasai hikas”.

Rate this item
(0 votes)
Last modified on Kuarta, 09 Outubru 2019 21:50