Prezidente Parlamentu Nasionál (PN), Arão Noe de Jesus hateten, alterasaun ba dekretu lei ba alterasaun LAP hetan ona promulgasaun husi Xeke Estadu.

“Bele halo ona publikasaun iha Jornál-da-Repúblika atu bele vigora”, dehan nia, iha Uma Fukun PN, Sesta (18/1).

Arão hatutan, diploma ruma ne’ebé hetan promulgasaun husi Presidente Repúblika tuir regra normál tenke publika iha jornál repúblika atu lei ka diploma ne’e bele vigora.

Promulgasaun LAP ne’e fó ona dalan ba governu atu bele foti osan direita ba iha Fundu Petrolíferu atu bele halo investimentu iha indústria petrolífera tuir polítika governu nian.

Liu husi promulgasaun ne’e Orsamentu Jerál Estadu (OJE) tinan fiskál 2019 sei tuun ba biliaun $1.4, ne’ebé sei sai hanesan despeza governu nian durante tinan ida.

Opsaun seluk maka, Prezidente Repúblika bele veta OJE hodi haruka mai atu nune’e bele halo alterasaun hodi haketak orsamentu tokon $650 ne’ebé planu atu sosa asaun ne’e sei bele transfere hikas ba kofre Estadu.

Iha fatin hanesan, Vise-Prezidente Bankada FRETILIN, Francisco Miranda Branco hateten, Prezidente Repúblika promulga alterasaun LAP ne’e sei fó biban ba governu atu hasai osan husi fundu mina-rai nian.

“Ami nia preokupasaun ne’e kona-ba transparénsia iha jestaun finansas publika, tanba laiha ona vistu previu husi Tribunál Kontas”, dehan nia.

Nia hatutan, Tribunál kontas laiha ona podér atu halo vistu previa tanba LAP rasik hasai ona ninia kompeténsia atu hala’o fiskalizasaun.

Orsamentu ne’ebé atu sosa asaun ho montante tokon $650 ne’e sei haketak ona husi OJE 2019 no automatikamente sei foti direita iha fundu petrolíferu tanba lei fó dalan.