Xefe Suku Komoro, Eurico Guterres da Silva hateten, dekretu governu nian sai ona bandu populasaun tomak atu labele hela ka halo uma iha área protesaun hanesan mota ninin no mota laran.

“Komunidade sira tenke sai iha semana ida ne’e nia laran, tanba halo uma iha mota laran no taka loos drenajen bee sai nian”, dehan nia, iha servisu fatin, Komoro, horisehik.

Identifikasaun ne’ebé halo iha Suku Komoro, komunidade balun husi Munisípiu Baukau, Ermera no Lautem halo uma iha mota laran, ne’ebé kontra ona regulamentu dekretu lei.

Nia hatutan, iha semana ida ne’e nia laran maka la sai husi fatin ne’ebá, ekipa Servisu Água Saneamentu (SAS) ho sira nia ekipamentu pezadu sei sobu uma hirak ne’e.

“Uma kain tolu ne’e Governu sei la selu tanba sira halo uma ne’e laiha koñesimentu husi xefe suku no halo uma ne’e iha mota laran”, afirma Eurico.

Iha fatin seluk, reprezenta família uma kain tolu Juvita da Silva (32), la satisfás ho desizaun Estadu nian ne'ebé haruka sira sai husi fatin ne’ebá ho tempu semana ida.

Nian hatutan, sira hela iha ne’e tinan rua ona. Nune’e, komunidade barak mós hela besik hotu fatin ne’e, maibé tanbasá hasai maka uma kain tolu ne’e.

“Iha ne’e ami uma kain hirak maka hela besik hotu mota ninin ne’e, maibé hakfodak karta mai husi Estadu katak atu hasai maka uma kain tolu ne’e tanba dehan hela besik liu mota ninin no taka netik drenajen”, dehan nia.

Tuir observasaun diáriu ne’e, komunidade uma kain tolu ne'ebé governu atu hasai husi fatin ne’e hela besik duni mota ninin. Distánsia husi mota ninin ba komunidade sira nia hela fatin ne’e kuaze metru neen, ne’ebé bele fó ameasa ba sira iha tempu udan.