Dekretu governu nian ne’e hatuur regra sira kona-ba ezekusaun OJE 2020, ne’ebe hetan aprovasaun husi lei n.10/2020, loron 19 fulan-Outubru no aplika ba orsamentu sira ba orgaun no servisu husi administrasaun sentral, rejiaun administrative espesial, Oekusi Ambenu no seguransa sosial.

“Regra sira ne’ebé hatur iha diploma ne’e nia objektivu  maka, liu-liu, atu regula no fasilita ezekusaun orsamentu iha fulan hirak ikus tinan ida ne’e nian.Maioria husi norma hirak ne’ebé hatur ba OJE tinan 2019 nian uza fila fali iha dekretu governu nian ida ne’e, maibe ninia redusaun halo simples liutan no ninia organizasaun mós hadia ona atu fasilita ninia interpretasaun husi responsavel finansas nian sira husi setór publiku administrativu,” dehan Ministru Presidensia Konsellu Ministru Fideles Leite Magalaeñs iha Palasiu Governu, Sesta (23/10).

Alende ne’e mos dekretu lei mós bele halo klarifikasaun kona-ba prosesu realizasaun despeza, ho identifikasaun ne’eb’e klaru kona-ba faze oin-oin, atu bele halakon duvida hirak ne’ebé impede to’o oras ne’e inisiu husi prosedimentu aprovizionamentu nian sira ka aseitasaun kompromisu, liuliu kompromisu sira husi natureza plurianuál.

Iha kontrinuasaun husi esforsu atu halo desentralizasaun prosedimentu ezekusaun orsamentu nian, prevee posibilidade atu delega membru governu sira-nian kompetensia oin-oin ba diretor Jeral administrasaun finansas nian iha ninia ministeriu ka sekretariu estadu nian ne’ebé la integra iha ministeriu, ka ba titular kargu diresaun no xefia nian ne’ebé ekiparadu.