Print this page

Governu Apoiu Osan Millaun $15 ba Igreja Hala’o Atividade Sosial Featured

By Husi: Ekipa Independente Fevereiru 19, 2021 1949
PM Taur Matan Ruak selebra asinatura akordu subvensaun anual ba tinan 2021 nian ho konferensia Episkopal Timorense(CET).ne'ebe reprezenta husi Arsebispu Metropolitan Dili, Dom Vigilio do Carmo, SDB Foto: Independente PM Taur Matan Ruak selebra asinatura akordu subvensaun anual ba tinan 2021 nian ho konferensia Episkopal Timorense(CET).ne'ebe reprezenta husi Arsebispu Metropolitan Dili, Dom Vigilio do Carmo, SDB Foto: Independente

DILI:Governu Konstitusional lidera husi Primeiru-Ministru Taur Matan Ruak selebra asinatura akordu subvensaun anuál ba tinan 2021 nian ho Konferénsia Episkopal Timorense (CET-sigla Portugés) ne’ebé reprezenta husi Arsebispu Metropolitan Dili, Dom Virgílio do Carmo da Silva SDB, sesta ohin (19/2), iha Palacio Governu Dili.

Governu apoiu tan subvensaun dolar amerikanu millaun $15 ba Igreja lokál, hodi jere ba atividade sosiál, edukativu no umanidade nian, tuir Konkordata  entre Governu Timor-Leste ho Santa Sé  ne’ebé hala’o tiha ona iha loron 14 fulan-agostu tinan 2015.

Hafoin asinatura, Xefe Governu iha nia lia murak, hateten, nu’udar onra hodi asina akordu subvensaun ho CET, ne’ebé tinan-tinan Governu dispoin ba Igreja lokál tuir Konkordata, ne’ebé tinan ne’e, Governu ba dahuluk deside fó dolar amerikanu millaun $15, atu Igreja lokál uza ba atividade sosiál ne’ebé planeada. 

“ Onra bo’ot dala ida tan asina akordu ho Reverendísimu Dom Virgílio do Carmo kona-ba subvensaun ne’ebé tinan-tinanGovernu dispoin tuir akordu konkordata ba iha Konferénsia Episkopal. Tinan ida ne’e primeira vés Governu deside aumenta tetu orsamentu ba 15 milloins tuir posibilidade ne’ebé Governu iha atu finansia atividade sira ne’ebé planeada tuir Konferensia Episkopal ninia planu,” dehan Xefe Governu.

Xefe Ezekutivu mós agradese ba esforsu Konferénsia Episkopal tanba submete ona relatóriu subvensaun tinan kotuk nian.

Liután Governu oferta ba CET programa foun Governu nian, Dalan ba Futuru, programa ne’ebé daudaun ne’e Ministériu no Instituisaun Estadu sira uja ba define programa, sub-programa no atividade no alokasaun finanseira no ajuda atu define metas no objetivu ne’ebé Governu atu atinji, no karik CET interesadu, Xefe Governu sei haruka UPMA hodi bele introduz sistema refere ba CET atu bele iha koñesimentu.

Ikus liu, Xefe Governu mós sujere envés tinan-tinan Primeiru-Ministru no Prezidente Konferénsia Episkopal mak asina subvensaun anual kada tinan, prefere selebrasaun ba tinan lima dala ida no iha implementasaun orsamentu anual mak kada tinan hosi parte Governu reprezenta hosi Ministru Finansas no parte CET nian hosi Vigária Episkopal.

Iha serimónia asinatura ne’e, Arsebispu Arkedioseze Dili, Dom Vergílio do Carmo mak asina subvensaun refere tanba Prezidente Episkopal Timorense, atual Bispu Dioseze Maliana Dom Norberto do Amaral labele partisipa, tanba Munisípiu Bobonaro daudaun ne’e iha hela serka sanitária to’o loron 3 fulan marsu, ne’ebé proibi total movimentasaun tantu hosi no ba Munisípiu Bobonaro ho kapitál no Munisípiu seluk.

Nune’e mós reprezentante Vatikanu labele testemuña mós iha serimónia ne’e, tanba kumpre hela kuarentena hafoin fila hosi vizita ida ba Malázia.

Subvensaun millaun $15 refere, 50% sei ba área edukasaun, 25% ba serbisu sosiál, 15% ba Governu Eklesiástika no 10% ba jestaun administrativa nian.

Hola parte iha serimónia ne’e, Bispu Dioseze Baukau, Dom Basílio do Nacimento inklui padre balun, Ministru Prezidénsia Konsellu.

Rate this item
(0 votes)
Last modified on Sábadu, 20 Fevereiru 2021 09:37