Segunda, 14 Outubru 2019 | Login
PNTL Munisipiu Likisa konsege kaptura suspeitu na’in tolu ne’ebé uza karreta estadu tama Indonezia no tula Ai-kameli ho kilat manu. FOTO: kontributór PNTL Munisipiu Likisa konsege kaptura suspeitu na’in tolu ne’ebé uza karreta estadu tama Indonezia no tula Ai-kameli ho kilat manu. FOTO: kontributór

Funsionarius MTK ho Karreta Estadu Tula Ai-kameli no Kilat Manu Ilegal Featured

DILI: Funsionariu Públiku husi Ministériu Transporte no Komunikasaun (MTK) na’in tolu (3) ho inisial ENPB, SV, no MJB komete krime tanba lori karreta estadu hakat ba area Indonezia hodi tula ai-kameli no kilat manu.

Tuir informasaun husi Polisia Nasionál Timor Leste (PNTL) Munisipiu Likisa, funsionariu na’in tolu ne’e tama iha area Indonezia nia hodi halo transaksaun balun.

Autoridade seguransa Indonezia nian ne’ebé deteta koko atu hapara, maibé kondutór karreta estadu ne’e halai ho velusidade maka’as no konsege ultrapasa area fronteira no tama mai iha Timor Leste.

Maibé, sira-nia “viajen” ne’e tenke para iha Likisa hafoin PNTL Munisipiu Likisa taka estrada ho karreta ida.

“Ami halo cheek point iha Sabadu (25/05) meiudia maizumenus tuku 12, ami kaptura tanba karreta (estadu) ida ne’e tama iha Indonezia. (autoridade seguransa) Indonezia duni (maibé) sira halai ho velusidade maka’as ne’ebé labele kaer no tama to’o iha fronteira, entaun tama iha ami-nia area jurídiku, Likisá, ami uza planu lori karreta seluk taka dalan, tenke kaer nia,” informa Komandante PNTL Munisípiu Likisa, Superintendente Asistente, Luis da Silva ba jornalista INDEPENDENTE liu husi telefone, Domingu (26/05).

Hafoin ida ne’e, polisia halo pasarevista ba karreta estadu ho xapa matrikula 04.900 G ne’e no konsege hetan ai-kameli plastiku metan naton ida no kilat manu ida.

Karreta estadu ne’e identifika nu’udar karreta ne’ebé utuliza husi diretór balun iha Ministériu Transporte no Komunikasaun (MTK).

“Karreta (estadu) ne’e pertense ba Ministériu Transporte no Komunikasaun, diretór balun nian. Sira na’in tolu ne’e funsionáriu hotu,” dehan nia.

Luis dehan, prosesu investigasaun ba kazu ne’e kontinua la’o, no PNTL Likisa sei submete ba Ministériu Públiku hodi prosesa ba tribunal.

“Sira na’in tolu kontra ona orden patrimóniu estadu nian, tanba loron boot sira labele uza karreta mais sira uza karreta estadu, depois la’os la’o deit iha ita-nia rain, mais to’o iha rai li’ur, depois hatama ai-kameli no hatama mós senapan (kilat manu), ida ne’e kontra lei, tanba ne’e prosesu la’o hela,” nia afirma.

Read 358 times
Rate this item
(0 votes)
MidAd1