Print this page

Fulan ne’e, Tenke Reintegra Komunidade Leorema Featured

By Domingos Gomes Agostu 07, 2019 5315
Populasaun Suku Leorema Aldeia Baura Postu Administrativu Bazartete refuzia iha Komando PNTL Munisípiu Liquisa durante fulan ida resin, hafoin Konfrontu entre Arte Marsial iha Aldeia refere hodi rezulta mate 2 no Sunu Uma 13. Liquisa, (06/08) FOTO: INDEPENDENTE Populasaun Suku Leorema Aldeia Baura Postu Administrativu Bazartete refuzia iha Komando PNTL Munisípiu Liquisa durante fulan ida resin, hafoin Konfrontu entre Arte Marsial iha Aldeia refere hodi rezulta mate 2 no Sunu Uma 13. Liquisa, (06/08) FOTO: INDEPENDENTE

LIKISA: Fulan ida ona uma-kain 12 husi aldeia Baura, Suku Leorema, Postu Administrativu Bazartete, Munisipiu Likisa hela iha edifisiu Polisia Nasionál Timor Leste (PNTL) Munisipiu Likisa.

Autoridade munisipiu hamutuk ho parte seguransa halo ona esforsu lubuk ida atu bele reintegra komunidade sira ne’e, maibé sei hasoru dezafiu balun tanba komunidade balun ezije atu molok tenke kaptura hotu ona suspeitu sira molok reintrega.

Komandante PNTL Munisipiu Likisa interinu, Superintendente Asistente Luis da Silva informa, durante ne’e bainhira hala’o dialogu mosu ezijensia atu tenke kaptura suspeitu sira no hili Xefe Suku foun.

“Suspeitu na’in 11 ita kaer hotu ba tuir prosesu (iha tribunal) no Xefe Suku foun agora Konsellu Suku deside ona, feto ida, interina hela, hein estadu entrega ona servisu ita bele reintegra komunidade sira,” deklara Luis liu husi intervista ho jornalista INDEPENDENTE iha Likisa, Tersa (06/08).

Nia afirma, Konsellu Suku Leorema deside ona Clara de Araujo hodi assume kargu nu’udar Xefe Suku interina. “Fiar katak iha fulan ida ne’e nia laran ita lori fila ona sira ba idaidak nia fatin.”

Iha fatin ketak, Administradór Munisipiu Likisa Domingos da Conceição dos Santos hatete, atu garante komunidade sira hakmatek dalan di’ak mak tenke halo dialógu.

“Dalan ida ba prosesu (justisa) la’o nafatin no ida ba dialógu ita kontinua la’o atu nune’e komunidade sira tenke simu malu fali,” dehan nia iha nia knar-fatin. Durante ne’e, nia dehan, nia parte hala’o esforsu atu konvense komunidade sira iha suku Leorema hodi bele simu malu, maibé seidauk konsege.

“Ha’u hanesan autoridade munisipiu Likisa sente triste ita Timor-oan rasik sai inimigu no sai refujiadu iha ita-nia rain rasik.”

“Esforsu dialógu ita halo hotu ona, maibé ita-nia ema sira ne’e laiha konsensia, kontinua oho malu, tanba ne’e ha’u sei buka maneira seluk atu envolve Igreja,” dehan nia.

Rate this item
(0 votes)