FONGTIL sei Buka Dalan Oioin Trava Arogansia MJ Carceres Featured

By Ekipa INDEPENDENTE Jullu 20, 2020 2194
Ministru Justisa Carceres. Ministru Justisa Carceres.

DILI: Forum Organizasaun Naun-governamental Timor-Leste (FONGTIL) konsidera Ministru Justisa (MJ) Manuel Carceres ninia arogansia tanba hakarak atu avansa ho Lei Difamasaun.

Diretór Ezekutivu FONGTIL Daniel Santos do Carmo hatete, deklarasaun husi MJ Carceres hatudu ninia egoizmu no ambisaun, tan ne’e FONGTIL sei halo tentativa oioin atu trava lei ne’e.

“Maske nia (MJ Carceres) hatete (manifestasaun) ne’e U ka saida, maibé ami sei halo tentativa oioin atu trava lei ida ne’e, ita tenke luta maka’as atu trava lei ida ne’e tanba ita hatene katak governu iha tiha ona hanoin la di’ak atu lakohi liberdade espresaun akontese ita-nia rain,” dehan Diretór Ezekutivu FONGTIL Daniel Santos do Carmo ba Jornál INDEPEDENTE iha nia kna’ar fatin, Kaikoli, Sesta (16/07).

Tuir nia, deklarasaun Ministru Carceres hodi avansa ho lei difamasaun no hatete manifestasaun ne’e urusan hatudu nia an hanesan ema ne’ebé lakohi rona sosiadade no la atende prinsipiu nasaun direitu demokratiku.

“Depois nia (MJ Carceres) dehan ne’e urusan ne’e tanba nia egoizmu polítiku ka ambisaun governu nian, liu-liu MJ nian, hodi hatur sira-nia an hanesan ema ne’ebé lakohi rona sosiédade no la entende kona-ba ita ninia prinsipiu husi nasaun direitu demokrátiku”.

“Tanba buat ida konsulta públiku, rona ema ne’e mak importante, maibé se bainhira hasai lia-fuan sira hanesan ne’e hatudu arogansia entaun ne’e sei la rezolve problema. Entaun só arogansia orsida bele hatun imajen TL ninian iha mundu,” nia hatete.

Molok ne’e, Ministru Justisa Manuel Carcerres deklara, sosiadade iha direitu atu halo manifestasaun.

“Sosiedade halo demostrasaun ne’e sira-nia direitu, no sira-nia urusan, labele kahur buat ida ho buat seluk, no ha’u mós labele ba dehan sira halo manifestasaun labele, ne’e ema-nia direitu no ema-nia hakarak, halo ba, maibé lei regula ita hotu-hotu,” deklara Ministru Carcerres iha palasiu governu hafoin reuniaun Konsellu Ministru, Kuarta (15/07).

Carcerres dehan, ema barak mak fó ona sira-nia opiniaun, maibé kuaze hanesan de’it, hotu-hotu deklara sira-nia pozisaun.

Tuir nia, Ministériu Justisa husu pareser laos pozisaun.

“Ministériu (Justisa) husu sira-nia pareser, laos sira-nia pozisaun. Pareser ho hanoin ne’e buat seluk, presiza ajuda malu, Ministeriu mesak hakarak rona hotu-hotu no mós jornalista,” dehan nia.

Kona-ba hanoin husi sosiadade atu avansa ho lei cybercrime, Ministru ne’e dehan, ida ne’e buat ketak ida. Tanba, lei cybercrime koalia kona-ba dadus informatika, la’os koalia kona-ba onra.

“Onra ne’e bein juridiku konstituisional ne’ebé hakerek iha artigu 36 Konstituisaun RDTL,” nia hatete.

Rate this item
(0 votes)

Independente Digital TV