Print this page

Familia: Ami Hatene Vera Mate Ona Featured

By Domingos Gomes Setembru 03, 2019 5190
Familia Vera Carvalho Martins, Nafatin sunu lilin iha Meja ne’ebé hatuur nia Imajen sira hodi hein Sr. Natalisto Da Costa Ximenes no Polísia Servisu Investigasaun Kriminal (PSIK) atu entrega nia Mate Isin ba Família hodi Halót. Aitarak Laran. Dili, (02/09) FOTO: INDEPENDENTE Familia Vera Carvalho Martins, Nafatin sunu lilin iha Meja ne’ebé hatuur nia Imajen sira hodi hein Sr. Natalisto Da Costa Ximenes no Polísia Servisu Investigasaun Kriminal (PSIK) atu entrega nia Mate Isin ba Família hodi Halót. Aitarak Laran. Dili, (02/09) FOTO: INDEPENDENTE

DILI: Kazu Vera Carvalho Martins sai ‘misteriu’ boot ida. Iha parte seluk defeza husi arguidu sira hatete katak Vera sei moris, maibé iha parte seluk, familia husi Vera dehan sira hatene Vera mate ona.

Defeza husi arguidu na’in 4, Natalisto da Costa Ximenes, João Tete Goncalves, Agustinho de Jesus, no Nicolao da Costa ne’ebé akuza oho Vera, deklara katak mate-ruin ne’ebé daudauk ne’e iha hela mortuariu la’os Vera Carvalho Martins nia ruin.

Adelina Maluk Lobo ne’ebé durante ne’e akompaña ninia kliente hatete, tuir ninia observasaun bazeia ba faktus no informasaun kredivel, konklui katak Vera Carvalho Martins sei moris.

“Maibé ita seidauk serteza nia paradeiru iha ne’ebé. Ha’u nu’udar defeza sei foti asaun seriu ba prosesu ida ne’e,” dehan nia foin lalais. Adelina hatete, nia parte sei koopera ho PNTL atu buka tuir paradeiru husi Vera. “Se karik Vera sei moris, ami sei halo asaun sivil no krime hasoru nia,” deklara nia.

Ba Kestaun ne’e, Vera nia kuñada, Jenoveva de Araujo hatete, durante ne’e familia hatene Vera mate ona. Nia hatete, polisia rasik mak tula Vera nia familia ba Komandu Munisipiu Dili hodi informa katak mate-ruin ne’ebé hetan iha Subaun ne’e Vera nian.

“Ami rona loloos Vera mate ne’e iha loron 12 fulan Setembru 2018, tanba polisia rasik mai iha uma tula ha’u-nia laen ba iha Komandu Munisipiu Dili hodi fó hatene katak “imi-nia alin mak ida foin lalais ne’e mate iha Subaun,” informa Jenoveva ba jornalista INDEPENDENTE iha nia hela fatin Kampung Alor, Segunda (02/09).

Jenoveva dehan, iha 2 Jullu 2018 meiudia, arguidu Natalisto da Costa Ximenes rasik mak mai iha uma Kampung Alor hodi tula Vera. “Dehan atu ba foho mak to’o Vera lakon tiha, maibé agora dehan fali Vera moris, ne’e nia paradeiru iha ne’ebé familia rasik la hatene,” dehan nia.

Tuir nia, familia fiar ba prosesu ne’ebé polisia halo no deklarasaun husi arguidu sira ne’ebé hatete katak sira lori Vera ba Kristu Rei no oho iha ne’ebá.

“Ho deklasaun (arguidu) sira ne’e mak halo ami familia sira fiar, tanba ita ema ne’e laos beik naran koalia de’it.”

Familia husu Responsabilidade Familia Vera Carvalho Martins husu ba arguidu Natalisto da Costa Ximenes atu hatudu ninia responsabilidade hodi hatudu Vera nia paradeiru tanba arguidu mak tula Vera husi nia hela fatin iha Kampung Alor.

“Ami familia rasik seidauk hatene loos katak agora ne’e nia moris ka mate, tanba ne’e arguidu Natalisto da Costa Ximenes tenke mai hatudu fali ba ami familia sira, tanba nia mak mai lori ha’u-nia alin,” dehan Jenoveva.

Durante ne’e, nia dehan, familia hatene katak Vera mate ona no sunu lilin hodi reza ba nia klamar. “Se Vera sei moris karik agora nia iha ne’ebé?, ami husu ba arguidu Natalisto da Costa Ximenes atu tenke lori fila Vera hodi entrega ba ami, familia.”

Iha fatin hanesan, Xefe Aldeia Aitarak-Laran, Suku Kampung Alor Frangelino Maia husu ba PNTL no TDD atu hatudu ba familia Vera iha ne’ebé se mate-ruin ne’ebé daudauk ne’e iha Ospital Nasionál Guido Valadares la’os Vera nia ruin.

Tuir loloos, nia dehan, tenke husu ba arguidu Natalisto da Costa Ximenes, Vera agora iha ne’ebé, tanba nia mak mai iha uma hodi lori sai Vera no to’o ohin loron la fila mai uma.

“Buat ne’ebé familia sunu lilin loron-kalan iha uma ne’e laos buat ida halimar nian, tanba familia fiar ba polisia no tribunal, tanba iha dekrasaun katak Vera mate ona. Tanba ne’e ha’u husu ba polisia no tribunal tenke mai esplika ba familia se laos Vera nia ruin, nune’e familia sira bele hatene,” dehan nia.

Rate this item
(0 votes)