Print this page

F-FDTL Taka Odamatan ba Joven ne’ebé Inan-aman Hela iha Indonezia Featured

By Cristina Ximenes Outubru 17, 2019 6610
Komandante Lere Komandante Lere

DILI: Prosesu rekrutamentu ba membru foun FALINTIL Forsa Defeza Timor Leste (F-FDTL) ba tinan 2020 hahú ona, no F-FDTL taka ninia odamatan ba ema ne’ebé nia inan-aman hela iha Indonezia ne’ebé hakarak tuir teste hodi sai membru F-FDTL.

Xefe Estadu Maior Jeneral F-FDTL, Maijor Jeneral Lere Anan Timur hatete, prosesu rekrutamentu ba membru foun F-FDTL sei halo rigoruzu liu tan.

Iha rekrutamentu ne’e, Lere dehan, sei fó prioridade ba veteranu no ema rejistensia nia oan.

Aleinde ne’e, Lere hatutan, F-FDTL mós sei husu tuir paradeiru husi inan-aman husi joven sira ne’ebé hakarak sai membru F-FDTL.

“Tenke hatene kada rekruta ninia inan-aman ne’e moris iha ne’ebé, dala-ruma oan balun, belun balun ninia inan-aman iha Atambua ne’eba sira haruka mai iha ne’e atu kria kondisaun.”

“Tanba atu sai militar ne’e lutu ba nasaun, atu defende soberania nasaun ninian, ne’e mak rekrutamentu ida ne’e tenke rigorozu uitoan, tenke husu tuir (paradeiru inan-aman),” dehan Maijor Jeneral Lere hafoin hasoru-malu ho Prezidente Repúblika Francisco Guterres Lu Olo iha Palasiu Prezidensial, Kuarta (16/10).

Maijor Jeneral ne’e dehan, bainhira hakarak sai Timor-oan, tenke sai Timor-oan ne’ebé loloos katak oan no inan-aman sira tenke hela iha Timor Leste.

“Se inan-aman iha Atambua pasiensia ita labele sai (membru) Forsa Armadas tanba inan-aman iha hela sorin,” dehan nia.

Lere dehan, nia la fó sala ba oan sira husi inan-aman ne’ebé iha tempu uluk lakohi ukun aan, maibé inan-aman tenke hahú eduka nia oan sira hodi bele iha sentidu estadu.

“Ita la fó sala ba oan. Maibé agora depende mós inan-aman tenke eduka ninia oan no oan mós tenke manan sentidu estadu ne’e, sai nasionalizmu, sidadaun di’ak, nasionalista di’ak no patritiotizmu tenke maka’as,” deklara nia.

Kona-ba enkontru ho PR Lu Olo, Lere hatete, nia informa ba Xefe Estadu kona-ba prosesu rekrutamentu ba membru F-FDTL ba tinan 2020 ne’ebé hahú iha tinan ida ne’e.

“Ha’u iforma mós ba PR kona-ba rekrutamentu, iha tinan ida ne’e hahú prosesu rekrutamentu F-FDTL nian, kona-ba selesaun, kona-ba dokumentasaun, buat sira ne’e mós iha kriteiru ne’ebé rigorozu,” dehan nia.

Rate this item
(0 votes)