Komandante daruak husi Polisia Munisipiu Dili Superintendete Asistente Polisia, Euclides Belo informa, iha loron segunda dader (15/6) iha oras tuku 10:00, estudante na’in 14 lori panfletu hodi halo asaun protestu iha Embaixada Indonézia nian oin hodi hatudu solidariedade ba povu Papua.
Asaun solidariedade ne’ebé maka estudante sira halo ne’e laiha karta koñesementu ruma ba parte seguransa, tanba ne’e bainhira sira halo asaun komunidade sira liga mai iha PNTL Munsipiu Dili nune’e komandu autoriza ekipa partrullamentu husi eskuadra Vera-Kruz nian hodi halo atuasaun.
Iha momentu ne’e polisia kaptura manifestante na’in 14, no oras ne’e sira iha hela sela detensaun Munisipiu Dili hodi kumpri oras 72 hafoin hakat ba primeira interogatoriu.
“Ha’u hanoin kualker asaun ruma tenke fó konesimentu ba polisia atu autoriza ka la’e, agora karta ruma mós la mai se maka resposabiliza ba asaun ne’e mós polisia lahatene, entaun asaun ne’e konsidera illegal, bazeia ba lei númeru 1/2016 kona-ba administrasaun,”dehan nia, iha knaar fatin, Kaikoli, horisehik.
Manifestante sira ne’e agora daudauk kompleta sira nia aktus, Auto partisipasaun haruka ona ba Munistériu Públiku, ne’ebé sira na’in hirak ne’e sei kumpri hela lei iha sela.
Euclides esplika, demostrasaun tuir rekezitu prosesual lei númeru 1/2016 ne’e PNTL sei bele fó garantia, maibé tenke manda karta ruma mai polisia antes minimu loron lima emkordenasaun atu nune’e polisia bele aseguransa seguransa.
Alende ne’e manifestante sira mós la kumpri prosesu legais hanesan distansiamentu metru 100 husi edifisiu públiku dipolomata sira nian, tanba ne’e polisia sei la tolera asaun sira ne’ebé kontra lei.
Komandante daruak ne’e dehan, tuir Ministériu Públiku nian ekipa seksaun investigasaun nian deklara katak, estudante sira balu mai husi Universiadade Nasionál Timor-Lorosa’e (UNTL), restante ne’e hein auto kriminal fó mai maka bele infoma.
Polisia Indonesia Kaptura Ativista Papua
Ativista timoroan halo asaun pasifika relasionadu ativista Papua sira ne’ebé hetan kapturasaun husi Polisia Indonesia Repúblika Indonesia.
Polisia kaptura ativista Papua sira tanba akuzadu halo traisaun, hasae bandeira Bintang Kejora, iha Palacio Presidensial Indonesia nia oin, loron 28 fulan-Agosto 2019.
Ativista Papua hetan kapturasaun tanba involve hasae bandeira Bintang Kejora ne’e, mak hanesan Charles Kossay no Dano Anes Tabuni.
Entretantu ativista Papua sira seluk hetan kapturasaun tanba halo asaun solidariedade ezijé fó liberdade ba sira nia kolega na’in rua ne’e no involve iha kazu seluk luta ba libertasaun Papua. Hanesan Isay Wenda, Ambrosius Mulait, Mussa, Sei Hilapok, Agus Kossay, Steven Itlay, no Buchtar Tabuni.