Extende EE, Komunidade Ezijé Governu Realiza Promesa Featured

By Júlia Da Costa Maiu 26, 2020 3580
Palacio Governu Palacio Governu

DILI: Komunidade iha Dili laran, laiha objesaun ba desizaun governu hodi extende periode Estadu Emerjensia, maibé ezijé ba governu atu realiza ona ninia promesa atu fó subsidiu ba komunidade.

Komunidade husi Aldeia Matua, Suku Tuana-laran, Postu Administrativu Nain Feto, Munisipiu Dili, Silvania Ferdiana Pereira hatete, extensaun ba Estadu Emerjensia ne’e ho objetivu atu halo prevensaun ba Corona Virus atu labele da’et ba komunidade, ne’e hanesan sidadaun ida la iha duvida.

Extensaun ba Estadu Emerjensia ne’e bada la tolu ona, hanesan povu bain-bain durante ne’e iha de’it uma sente triste, tanba nesesidade ba familia menus tebes kompara ho situasaun bain-bain.

 Extende Estadu Emerjensia ne’e komunidade barak maka la satisfaz, tanba durante la iha buat ida maka garantia ba moris familia uma laran nian. Tanba ne’e hanesan komunidade husu ba governu atu labele taka dalan ba povu atu buka moris.

“Ami husu ba governu atu loke dalan mai ami atu buka moris, tanba extende Estadu Emerjensia ba dala tolu ona, governu halo de’it premesa dehan atu fó subsidiu , maibé to’o agora la realiza,” dehan nia, iha Villa-Verde, tersa-ohin.

Iha fatin ketak, komunidade husi Aldeia Bekusi Sentru, Suku Bekora, Postu Administrativu Kristu Rei, Munisipiu Dili, Fransisco Antonio Rodrigues hatete, Estadu Emerjensia durante fulan rua nia laran komunidade sente terus, tanba halo atividade negosiu hanesan fa’an sasán ema la sosa nune’e labele hetan osan hodi sustenta familia uma laran.

“Estadu Emerjensia ne’e aumenta tan fulan ida ne’e halo ami povu maka terus tan de’it, dehan atu fó subsidiu mós to’o agora promete loos de’it, maibé to’o bainhira maka atu realiza,” dehan nia, iha Bekora, horisehik.

Nia dehan, kona-ba subsidiu ne’e povu la husu, maibé ne’e governu maka foti inisiativa hodi promete ba povu, no ninia osan aprova ona ne’e povu nia direitu atu hetan.

 

Rate this item
(0 votes)
Last modified on Tersa, 26 Maiu 2020 22:16

Independente Digital TV