Eis Ativista Gil La Konkorda Lere Ameasa Angela Featured

By Domingos Gomes Setembru 03, 2020 5330
Eis Ativista Virgilio Guterres. Eis Ativista Virgilio Guterres.

DILI:Eis ativista Virgilio da Silva Guterres la konkorda Maijór Jeneral Lere Anan Timur ameasa ba sidadaun sira ne’ebé hakarak atu espresa sira-nia hanoin liu husi manifestasaun.

Tuir nia, nu’udar ulun-boot husi F-FDTL ne’ebé ema hotu orgullu no ema hotu onradu, liu-liu tanba valor ne’ebé Falintil lori mai, uza meius komunikasaun sosiál atu ameasa sidadaun sira ne’e buat ne’ebé laiha kabementu polítiku.

Virgilio dehan, asuntu ne’e la’os la’os asuntu militar ka asuntu forsa armadas nian, maibé asuntu PNTL ninia, tan ne’e loloos Komandante Jerál PNTL mak ko’alia, tanba laiha buat ruma relasióna ho militar.

“Militar de’it konstituisaun ka lei hatete ne’e sai lutu nasaun ninian, bainhira iha ameasa esterna ruma mai ne’e mak militar sira bele ko’alia no mós Komandante Militar ne’e hein atu ezekuta orden husi Komandante Supremu, iha kazu ida ne’e Prezidente Repúblika, entaun ida ne’e mak hanesan pontu balun ne’ebé ha’u pessoalmente deskorda ho deklarasaun Xefe Estadu Maijór Lere nian, liu-liu uza lia-fuan sira hanesan futu, sama belar ne’e ema dehan ne’e violensia verbal tanba tipu violensia ne’e, violensia fizika, violensia verbal.”

“Ita uza lia-fuan sira ne’e hodi ameasa sidadaun ne’e violensia verbal, ha’u hanoin Xefe Estadu Maijór Lere ho respeitu tomak la presiza atu tuun to’o iha nivel ida atu atende ema ida ka sidadaun ruma, grupu polítiku ida ninia interese, ne’e iha ha’u-nia facebook ha’u dehan ne’e la’os level ida atu Xefe Estadu Maijór ida atu atende, ne’e PNTL ninian, ida ne’e mak ha’u nia deskordansia,” dehan nia.

Virgilio hatutan, konstituisaun RDTL garante sidadaun idaidak nia liberdade atu hato’o nia opiniaun.

“Opiniaun ne’e atu at to’o iha ne’ebé mós nia iha liberdade atu hato’o, agora kestaun ne’e estadu mak tenke garante atu espresaun sidadaun ida nia opiniaun ne’e labele prejudika sidadaun sira seluk ninia interese katak se movimentu ida agora dadaun ne’ebé Angela Freitas lidera ho maun Aitahan Matak lidera ne’e sira iha liberdade tomak. Maibé espresaun ka manifestasaun sira ne’ebé sira hakarak halo ne’e mós labele prejudika ema seluk ninia liberdade, tanba razaun ida ne’e mak sira halo komunikasaun, koordenasaun ho ita-nia PNTL atu PNTL bele garante fatin ida ne’ebé apropriadu ba sira no fatin ne’ebé bele fasilita mós PNTL atu garante seguransa no fatin ne’ebé halo atu sira-nia manifestasaun ne’e labele desturba movimentu ka interese públiku sira seluk.”

“Ita haree hela tanba sa mak Xefe Estadu Maijór Lere hakarak halo intervensaun hotu, at liu tan horsehik (1/9) ita haree militar tenke ba marka prezensa iha Angela nia uma, ba halo saida? ida ne’e ba ha’u intimidasaun,” nia dehan.

Rate this item
(1 Vote)

Independente Digital TV