Print this page

dr. Rui: Suspeitu Covid-19 Hamutuk 25 Featured

By Jacinto Xavier Abril 01, 2020 3357
dr. Rui dr. Rui

DILI:Sentru Integradu Jestaun Krize ne’ebé lideradu husi Primeiru Ministru Taur Matan Ruak informa, hahú husi fulan-fevereiru too agora Timor-Leste konsege resjista ona ema hamutuk na’in 25 sai suspeitu ba Coronavirus (Covid-19).

Reprejentante Sentru Integradu Jestaun Krize, dr. Rui Maria de Araujo informa liu husi konferensia imprensa hatete, ema ne’ebé ohin loron sai suspeita ba Coronavirus ne’e mai husi nasaun afetadu sira.

“Hahú husi fulan-Fevereiru mai too agora suspeita ba Covid-19 hamutuk na’in 25, husi númeru ne’e tuir analiza laboratóriu foin ema ida maka pozitivu, no na’in rua maka ita sei hein hela nia rejultadu teste laboratoriu, loron rua ka tolu hanesan ne’e sei fó sai,”dehan nia, liuhusi konferensia imprensa, iha CCD, horisehik.

Eis Ministru Saúde ne’e husu atu komunidade tomak labele fiar ba boatu sira ne’ebé espalla iha públiku katak, ema pozitivu ba Covid-19 barak ona.

”Ema pozitivu ba Covid-19 barak ona ne’e laloos,”dehan nia.

Bainhira fó sai rejultadu, nia dehan ekipa tekniku husi Ministériu Saúde sei informa mai iha Sentru Integradu Jestaun Krize hafoin halo anunsiu ba públiku.

Oras ne’e teste laboratoriu hala’o de’it iha rai laran, maka lori fali ba iha Autralia hodi konfirma fali nia rejultadu.

Ema hirak sai suspeitu ne’e Timor-oan ka ema estranjeiru ne’e konfidensial, importante maka públiku hatene katak ema ne’e sidadaun ida.

Alende ne’e Rui mós informa kondisaun saúde atual vitima pozitivu viruscorona ne’e kondisaun estavel ona, la hatudu ona sintomas.

Maibé atu livre no sai husi ospitál tenke halo fali teste laboratoriu dala rua ho tempu ne’ebé la hanesan. Kuandu hatudu negativu ona ema ne’e bele dehan livre ona husi virus ne’e.

Eis Primeiru Ministru ne’e husu ba komunidade, iha situasaun ne’e bainhira semak laiha nesesidade atu sai, di’ak liu hakmatek iha uma, karik atu sai tenke uza maskra, no tenke garantia ejiene pesoal katak tama sai tenke fase liman beibeik, liman labele ka’er ba matan, ibun, no inus, tanba meius sira ne’e bele transmite virus.

Rate this item
(1 Vote)