Print this page

Dr. Rui: Ekipamentu Ne’ebé Enderessu ba CIGC Laos Privadu Featured

By Jasinto Xavier Juñu 05, 2020 2219
kopia kontratu Governu ho aviuan Airnorth no pakotu ekipamentu ne'ebe haruka husi Australia mai Dili. Foto Jonio da Costa/INDEPENDENTE. kopia kontratu Governu ho aviuan Airnorth no pakotu ekipamentu ne'ebe haruka husi Australia mai Dili. Foto Jonio da Costa/INDEPENDENTE.

DILI:Kontratu kooperasaun entre Governu Timor-Leste ho aviaun Airnorth-Australia hodi tula ekipamentus esensial surtu Covid-19 sai preokupasaun ema hotu tanba aviaun ne’e mós bele tula sasan privadu.

Kordenadór Ofisial Ligasaun Forsa Tarefa ba Centro Integrado Gestao Crises (CIGC), Dr. Rui Maria de Araújo klarifika katak sasan balun aviaun Airnorth tula husi Australia mai Dili ne’e na’in ONG Maluk Timor nian.

Liuhusi whatshap ba online INDEPENDENTE, kinta (5/6), Rui hatete ekipamentu Covid-19 haruka liuhusi Centro Integrado Gestao de Crise tanba buat hirak ne’e ema halo doasaun, hodi nunee bele fasilita ONG sira nia servisu.

Identifikadu dos ida de’it maka enderessu ba Dr. Rui Araújo/CIGC-Covid-19, CCD Dili.

Dos ida ne’e, tuir eis Ministru Saúde ne’e esplika, haruka husi Termometer Infrared Rotary Club Australia ba ONG Maluk Timor atu fahe ba Sentru Saúde ho Ospital sira, hodi halo servisu relasiona ho prevensaun & mitigasaun Covid 19 iha Timor-Leste.

“…ne’e Termometer Infrared Rotary Club Australia maka haruka ba ONG Maluk Timor atu fahe ba Sentru Saúde ho Ospital sira, hodi halo servisu relasiona ho prevensaun & mitigasaun Covid 19 iha Timor-Leste,”Dr. Rui klarifika notisia ne’ebé públika iha INDEPENDENTE Online ho tema “Kuarta Horsehik, Aviaun Airnorth Tula Sasan Mai DHL, Rui de Araújo no Domingos Savio”.

Online INDEPENDENTE tenta husu klarifikasaun detalladamente maibé nia hakotu tiha konversasaun ne’e.

Maski nune, Dr. Rui halo klarifikasaun liu husi nia pajina facebook, ne’ebé lamenta tebes ho notisia ne’e. Nia dehan, jornalista la halo check and recheck molok halo públikasaun.

“Jornalista antes hakerek lia fuan “desconfia” favor check lai faktus,”Rui lamenta. 

Iha nia pajina facebook, Dr. Rui hatudu provas balun (imajen) no konteúdu konversasaun entre nia ho Dr. Bethany,Maluk Timor nian.

“Hanesan representante ONG Maluk Timor hateten iha screenshot, termómetro infrared hirak ne’e haruka mai atu fahe ba Sentro Saúde ho Ospital sira”.

“Obrigado ba reportagem ne’ebé deskonfia ha’u uza avião Airnorth hodi haruka sasan privadu, sem verifika uluk faktus,”klarifika Dr. Rui iha nia pajina Facebook.

Entretantu, dadus ne’ebé INDEPENDENTE Online rekoilla iha Aeroportu, aviaun tula sasan husi Australia mai Dili, iha loron 3 fulan-Juñu 2020 (bazeia kontratu ne’ebé sei validu), ho nia total kargo todan total 474kg, kompostu husi dos ida ho todan kuaze 3kg, ho sasan sira seluk, inklui sasán eletronika hanesan telefone ho marka samsung, hamutuk unidade 81.

Sasan hirak ne’e tula husi aviaun Airnorth ho númeru flight TL0510 husi Darwin mai tuun iha Aeroportu Internasionál Nicolao Lobato Komoro iha oras, 11:30.

Tuir funsionariu ida iha Aeroportu Internasionál Nikolau Lobato Dili (lakohi temi nia identidade) hatete, makina X-ray identifika dos ida ne’ebé dirije ba Dr. Rui Araújo/CIGC-Covid-19, maka hanesan ABG Infrared Thermometer, batria, bee kantil haat, rebusadu no hahan coklate balun.

Hafoin sai husi Aeroportu Dili, sasan hirak ne’ebé akompaña husi diplomata timor-oan ida, tula ho kareta AVANZA koru verde ida too Hotel Beach Garden, Pantai-Kelapa Dili.

Molok ne’e, Ministru Transporte no Telekomunikasaun, José Agostinho da Silva rejeita ona katak aviaun Airnorth ne’ebé kontrata husi Governu la tula sasan privadu.

Nia dehan, governu Timor-Leste aluga aviaun Airnorth atu tula de’it materiál Covid-19, la’ós aproveita tula ho sasan privadu.

Nia esklarese ba públiku katak, governu Timor-Leste kontratu ho kompañia Airnorth, ne’e atu halo atendimentu ba nesesidade emerjénsia transporta ekipamentu medíkus mai TL.

Objetivu husi kontratu aviaun Airnorth ne’e atu mantein ligasaun hodi atende nesesidade Covid-19 nian. 

Ministru ne’e mós ónestu ba públiku katak, pozisaun iha aeroportu ne’e taka ba atividade komersiál, maibé ba de’it ekipamentus Covid-19. 

Enkuantu kontratu entre Governu Timor-Leste ho aviaun Airnorth, ne’ebé online INDEPENDENTE ne’e asesu, kontratu hahú validu husi loron 20 Abril too 3 Juñu 2020.

Iha kontratu ne’e sita de’it kona-ba tula de’it ekipamentu ne’ebé tama kategoria emerjensia no esensial liu hanesan ekipamentu Covid-19. Maibé la sita kona-ba tula sasan privadu no tula pasajeiru liga ba atividade komersiu.

Governu aluga aviaun ne’e kada vou ho folin rihun sanulu resin lima (15.000.00) hodi tula de’it materiál Covid-19. Semo dala tolu kada semana.

Rate this item
(0 votes)