“Totál millaun $1.8, kompara DOT ne’ebé fulan-fulan antes millaun $1.2. Fulan-Agostu ne’e hetan boot liu, tanba bazeia karta pedidu ne’ebé Prezidente Parlamentu haruka ba Primeiru Ministru. Atu kumpre mós subsídiu anuál ba deputadu sira ne’ebé seidauk kompleta” dehan Sekretária Jerál Parlamentu Nasionál, Cedelizia Faria dos Santos, iha Uma Fukun PN, horisehik.
Nia dehan, orsamentu ne’e inklui mós atu halo transferénsia UNDP (United Nations Development Programme) tanba iha programa ida atu halo joint program ho totál fundu rihun US$ 500-resin no mós meza parlamentu nasionál foun ne’ebé produs inklui hotu iha laran.
“Tanba ne’e ami halo pedidu ba transferénsia husi item seluk ba kapitál menór hodi bele halo pagamentu ba meza foun ne’ebé sei uza ba serimónia kulturál,” tenik Cedelizia.
Aleinde ne’e, iha mós manutensaun ba karreta no más pagamentu ba kompañia sira ne’ebé oferese hahán no halo limpeza iha parlamentu.
Nia akresenta, la’ós dívida boot, maibé montante ne’ebé uitoan, ne’ebé tenke halo ezersísiu se bele halo pagamentu iha fulan-Agostu ne’e nia-laran.
“Tanba ne’e mak fó impaktu ba DOT fulan-Agostu nian iha aumentu kuaze rihun $500-resin,” nia subliña.
Entretantu, DOT Parlamentu Nasionál $1.851.930 fahe ba kategoria saláriu vensimentu US$ 556.486, bens servisu US$ 1.200.527, transferénsia públika US$ 78.667, kapitál dezenvolvimentu US$ 16.250 no kapitál menór laiha.
