Xefe Departamentu Interina Pediatria Lourdes Leão informa, iha fulan 8 nia laran pasiente diareia na’in 294 mak halo tratamentu iha sala pediatria Hospital Nasional Guido Valadares.

Husi númeru ne’e, nia hatete, na’in 9 mak fila hikas ba Maromak nia kadunan.

“Pasiente na’in 9 ne’ebé mak mate na’in 5 baixa ho kondisaun má-nutrisaun grave, na’in 4 seluk diareia ho komplikasaun seluk,” dehan nia iha nia knaar fatin HNGV, Bidau, Segunda (07/09).

Nia hatutan, labarik sira afeita ba diareia ne’e barak mak tama iha má-nutrisaun grave, no komplikasaun ne’e sai a’as liu kompara ho pasiente sira ne’ebé mak ho nutrisaun di’ak.

Atu bele prevene labarik sira hetan moras diaria, nia hatete, inan sira tenke fase liman, tesi liman kukun no hamoos bainhira atu prepara hahan ba oan sira.

Nia husu bainhira oan sira hetan moras tenke lori lalais ba  fasilidade saúde sira ne’ebé besik atu hetan tratamentu sedu.