Deputadu Simu Subsidiu $450 ba Fatin Toba

By Ekipa INDEPENDENTE Agostu 18, 2020 1893
Deputadu sira iha Parlamentu Nasional. Deputadu sira iha Parlamentu Nasional.

DILI: Previlejiu ba reprezentante povu iha Parlamentu Nasionál hanesan la hotu. Aleinde simu salariu boot, kuaze $3.000 kada fulan, simu karreta, osan pulsa, no seluk tan, deputadu sira mós simu subsidiu $450 kada fulan atu bele uza hodi buka fatin deskansa.

Prezidente Parlamentu Nasionál Aniceto Guterres fó sai kona-ba montante subsidiu ba deputadu sira ne’ebé hanaran subsidiu alozamentu.

Tuir defisinisaun, alozamentu nu’udar buat ida ne’ebé prepara hodi fasilita nesesidade, ezemplu fatin toba hanesan otel no pouzada ka fatin hela provizoriu ba ema ne’ebé hala’o viajen . Signifika, PN oferese subsidiu alozamentu ba deputadu sira, atu sira bele uza hodi buka fatin deskansa ka toba.

“Imi hakarak hatene, deputadu ne’e ida-ida fulan ida simu subsidiu ba alozamentu $450, tinan ida deputadu ne’e simu hira? $5,400 deputadu ida. Se 65 deputadus, osan hira mak sai ona só ba subsidiu alozamentu?, depois osan ne’e nia gasta duni ka la’e? balun nia iha uma di’ak mós nia simu nafatin tanba ne’e subsidiu,” dehan Aniceto relasiona ho kritika husi sosiadade kona-ba planu PN atu harii edifisiu foun no uma ba deputadu sira iha Hera.

Ho subsidiu ba alozamentu ne’ebé boot, Aniceto dehan, bainhira harii edifisiu foun, bele aproveita hodi harii mós kompaun ba deputadu sira.

Bazeia ba informasaun ne’ebé jornal INDEPENDENTE rekolla husi fontes oioin, iha nasaun seluk alozamentu ba deputadu sira sai nu’udar buat baibain ida. Ezemplu, iha Indonezia ne’ebé harii ona uma ofisial ba deputadu sira, subsidiu alozamentu oferese de’it ba deputadu ne’ebé la hela iha uma ofisial ne’ebé prepara.

Tuir Aniceto, bainhira PN konsege harii duni rezidensia ba deputadu sira iha Hera sei konsege halo poupansa ba orsamentu ne’ebé PN gasta ba alozamentu.

Nia dehan, bainhira soma hamutuk subsidiu alozamentu ba deputadu 65, kada tinan PN aloka osan hamutuk $351,000.

“Se osan ne’e investe, tinan lima nian de’it mós bele halo uma ida ona, la’os uma luxu, uma naton atu deputadu sira,” dehan nia.

Bainhira deputadu sira hela ona iha fatin ne’ebé PN prepara, Aniceto hatete, deputadu sira la simu ona subsidiu alozamentu.

“Vantezen ida poupa osan, tanba se iha ona, deputadu ba hela ona uma ida ne’e, nia la hetan ona subsidiu. Se hotu-hotu hanesan ne’e, hotu-hotu la hetan, biar deputadu nia halo tiha nia uma, nia ba hela tiha mós fulan-fulan simu nafatin subsidiu entaun halo tiha uma iha ne’eba, ita-boot dehan uma laiha, uma mak ne’e, maibé subsidiu ba alozamentu laiha ona ka koa ona ba hotu estadu, maneira investimentu hanesan ne’e,” Prezidente PN ne’e esplika.

Tan ne’e, Aniceto ladun aseita ho kritika kona-ba harii uma ba deputadu sira, no nia konkorda liu bainhira kritika ba subsidiu alozamentu.

“Ita kestióna buat ruma ne’ebé laiha ulun, laiha ain, depois hanesan fali ita hanoin negativu hela de’it, se hanesan ne’e ita-boot sira kestióna mak subsidiu alozamentu deputadu sira nian ne’e karik ha’u fiar, ne’e ita bele diskute,” hatete nia.

Tuir informasaun ne'ebe espailla iha media sosial katak bazeia ba resolusaun PN no. 2/2008, Segunda Legislatura sobre atribuisaun regalia ba deputadus, maka kada deputadu hetan subsidiu kada fulan $450 ba alojamentu,  $4,000 kada tinan ba tratamentu saúde, lista prezensa kada loron $10, saldo telephone kada fulan $300, kombustivel kada fulan $400, subsidiu resesu kada tinan $2,000.

Aliende ne’e, reprezentante povu iha Parlamentu Nasionál, simu salariu boot kuaze $3.000 kada fulan, simu karreta, no seluk tan.

Rate this item
(0 votes)
Last modified on Tersa, 18 Agostu 2020 11:59

Independente Digital TV