Deputadu KHUNTO ‘Monu Ain’ Hafoin Naimori Fó Ultimatu Featured

By Aquino Gomes Jullu 21, 2020 1808
Naimori. Naimori.

DILI: Deputadu husi Bankada KHUNTO Luis Roberto kumpre duni ‘orden’ husi Konseleru Masimu partidu KHUNTO José Naimori Bukar, ne’ebé husu atu deputadu KHUNTO la halo konfrontu ho Igreja Katolika, liu-liu Amu Lulik sira.

Molok ‘orden’ ne’e mosu, Luis Roberto sai nu’udar deputadu KHUNTO nian ne’ebé sempre kritika no kestiona, deklarasaun no kritika husi Amu Lulik sira relasiona ho juramentu partidu KHUNTO.

Lia-fuan Luis Roberto ne’ebé halo ema barak kontra mak bainhira nia ezije Amu Lulik sira atu hasai batina bainhira hakarak halo politika.

Ho kritika ne’ebé hahú mosu nabnaban, ikus mai, Konselleru Masimu partidu KHUNTO mosu iha públiku hodi husu deskulpa ba Igreja no ba Amu Lulik sira.

Naimori iha ninia deklarasaun iha 15 Jullu 2020, fó mós ultimatu ba deputadu KHUNTO.

“Nune’e mós iha Bankada partidu KHUNTO nian, Luis Roberto no Mama Olinda hatete iha ne’ebá, ha’u mós lori sira-nia naran husu deskulpa, katak sira sei la koalia tan, tanba ne’e la’os orientasaun partidu nian, ne’e individual, tanba sira iha parlamentu sira bebas, sira iha direitu par atu koalia, mais ha’u fó hatene antes ona katak sira sei la koalia tan.”

“Karik loron ida sira sei koalia karik, ha’u sei toma desizaun ida ba sira par atu bele suspende sira iha momentu ne’ebá,” deklara Naimori.

Hafoin deklarasaun Naimori ne’e, iha Segunda (20/07), deputadu KHUNTO no atual Vise Prezidente PN, Luis Roberto da Silva mós ‘monu ain’.

Iha ninia intervensaun iha PN, Luis hatete, maske iha 15 Jullu 2020, Konseleru Masimu partidu KHUNTO husu deskulpa ona, maibé bankada KHUNTO iha PN mós hakarak atu husu tan deskulpa.

“Ha’u rasik nu’udar Vise Prezidente Parlamentu, hau-nia intervensaun politika dehan bainhira Amu sira hakarak sai politika karik hasai batina, ida ne’e mak kontra no sala, nu’udar ema sala nain la sees husi sala, ka liu husi sala mak ba loos, atan ha’u e nome Bankada KHUNTO no militantes no simpatizantes, ho hakraik aan husu deskulpa ita hotu,” dehan Luis iha plenaria PN, horseik.

Aleinde husu deskulpa, deputadu Luis mós rezeita informasaun iha media social ne’ebé akuza ema husi partidu KHUNTO baku rahun estatua Na’i Feto iha Fatuahi.

“Atu hakarak hatete ba públiku katak, ida ne’e Bankada KHUNTO rezeita, tanba ida ne’e informasaun ne’ebé la loos,” nia hatete.

Tan ne’e, nia husu ba Polisia Nasionál Timor-Leste (PNTL) atu halo investigasaun klean hodi bele identifika autór irresponsabilidade ne’ebé koko kria instabilidade iha Timor-Leste.

Entretantu, molok ne’e, Konselleru Partidu KHUNTO José Naimori Bukar, halo esklaresimentu kona-ba atividade juramentu ne’ebé KHUNTO halo durante ne’e.

Tuir Naimori, juramentu ne’ebé KHUNTO halo sai mós nu’udar kontribuisaun ida ba pas no estabilidade iha Timor-Leste.

Tanba, nia hatete, juramentu ne’e atu eduka KHUNTO nia membru sira hodi bele sai sidadaun ne’ebé di’ak, respeita ema seluk.

“Liu husi juramentu ida ne’e par atu labele hatete katak ‘o husi grupu ida ne’e, o husi lorosa’e, loromonu, o mai husi ras ou lian hanesan ne’e, iha partidu KHUNTO ne’e la’e,” dehan Naimori.

Konselleru Masimu partidu KHUNTO ne’e mós esklarese kona-ba batina ne’ebé nia hatais katak, nia la hatais hanesan Amu Lulik sira-nian.

“Atu klarifika loloos kona-ba imajen iha facebook, ha’u tau ha’u-nia batina, tau kruz iha kotuk, ha’u tau fitas hanesan Amu nian. La’e, deskulpa, ne’e ha’u nia fitas, uluk isin kiik kesi di’ak, agora isin boot kesi la di’ak, ne’e mak ha’u kaer. Kruz ida ha’u kaer ne’e loron sakrifisiu, hahú husi Indonezia nian to’o agora,” nia esplika.

Relasiona ho komentariu balun no públikasaun balun iha media sosial ne’ebé hatete katak KHUNTO hakarak atu kontra igreja, Naimori dehan, ida ne’e la loos.

“Ha’u sente katak nu’udar sarani, ita tenke respeita, nu’udar relijiaun Katolika, ita-nia boot mak igreja, ita-nia Na’i-lulik sira, Bispu sira. Ne’e mak iha dia 10 liu ba, ha’u ba hasoru Amu Bispu iha Maliana, nia fó parabéns tebtebes ba ha’u-nia deklarasaun ne’ebé hatete katak ‘Moris dala ida, mate dala ida, sarani dala ida, ne’e identidade orijinal, identidade nu’udar sarani Katolika ne’ebé durante ne’e ha’u hatudu,” dehan nia.

Ho polemika ne’ebé mosu durante semana hirak ne’e, Naimori ho nakloke husu deskulpa ba parte igreja.

“Ha’u lori KHUNTO ema rihun 30 resin ho membrus governu sira ho mós deputadu sira,  primeiru ami atu husu deskulpa ba ita-nia Bispu na’in tolu, ba ita-nia Igreja, liu-liu ba ita-nia Amu sira ne’ebé mak sai iha facebook  no buat sira ne’e hotu, tanba ita laiha liña koordenasaun ba malu mak buat sira ne’e sai hanesan ne’e, ne’ebé ami husu deskulpa”.

“Nune’e mós iha Bankada partidu KHUNTO nian, Luis Roberto no Mama Olinda hatete iha ne’ebá, ha’u mós lori sira-nia naran husu deskulpa, katak sira sei la koalia tan, tanba ne’e la’os orientasaun partidu nian, ne’e individual, tanba sira iha parlamentu sira bebas, sira iha direitu par atu koalia, mais ha’u fó hatene antes ona katak sira sei la koalia tan.”

“Karik loron ida sira sei koalia karik, ha’u sei toma desizaun ida ba sira par atu bele suspende sira iha momentu ne’ebá,” deklara Naimori.

Iha oportunidade ne’e, Naimori dehan, nia hakarak esplika ba públiku no ba parte igreja atu bele kompriende mós kona-ba lalaok iha partidu KHUNTO.

Karik iha loron ruma, partidu KHUNTO halo buat ruma ne’ebé la di’ak, Naimori husu ba parte Igreja atu bele bolu nia nu’udar sarani hodi ba esplika no esklarese.

Rate this item
(0 votes)

Independente Digital TV