“ Pasajeiru sira mai husi fronteira ne’e hamutuk na’in 111 maka mai halo konfinamentu obrigatóriu iha karantina Tasi-tolu sira nia amostra hasai hotu maibé 1 maka pozitivu sira seluk negativu hotu” dehan nia liuhusi konferensia imprensa iha Ministériu Saúde Kaikoli, ohin.

Nia esplika katak, pasiente pozitivu Covid-19 ne’e mane ho idade 46 sidadaun Indonezia, nia  mai sa’e aviaun Citilink to’o iha kupang iha loron 21 fulan-Jullu, sa’e kareta Avanza hamutuk ho pasajeiru na’in neen (6), labarik na’in ida (1), feto ida (1) no mane na’in haat (4) inklui motorista.

Iha loron 22 fulan-Jullu, pasiente ne’e hamutuk ho pasajeiru na’in 105 tama legal no na’in neen (6) tama illegal, tanba ne’e hamutuk 111 maka mai hamutuk halo konfinamentu obrigatóriu iha karantina Tasi-tolu.

Nia mós esplika katak, ekipa vizilansia epidiomolojia agora dadaun servisu maka’as hodi akompaña pasajeiru sira ne’e.

Nia mós informa katak, total kumulativu ema ne’ebé halo ezame laboratóriu hamutuk 4.244 kompostu husi na’in 4.186 maka rezultadu negativu no na’in 58 maka hein rezultadu teste laboratóriu. Agora dadaun ema na’in 256 maka halo konfinamentu obrigatóriu iha karantina Tasi-tolu. Ema na’in 144 maka halo autokuarentena. Total ema ne’ebé liu ona periodu kuarentena hamutuk 2.883.

Nia mós husu ba Komunidade sira katak, ho evolusaun surtu Covid-19, labele pániku no mantein nafatin halo prevensaun ba Covid-19 liuhusi uza maskara, kontinua halo distansiamentu fíziku no fase liman bebeik.

Tuir dadus anterior loron 15 fulan-Maiu, positivu konfirmadu 24, rekuperadu na’in 28 inklui pasiente provavel na’in haat (4).