Dadus 18 Maiu: Semana 3 Laiha Kazu Foun, Suspeitu 357 Hein Rejultadu Featured

By Elsa Belinha Maiu 18, 2020 2773
Dr. Rui Maria de Araujo Dr. Rui Maria de Araujo

DILI: Sentru Integradu Jestaun Krize (SIJK) relata katak dadus Covid-19 iha loron 18 fulan-Maiu ne’e suspeitu na’in 357 maka sei hein rezultadu teste laboratóriu.

Porta Voz Sentru Integradu Jestaun Krize (SIJK) Rui Maria de Araújo hatete, kazu konfirmadu pozitivu Covid-19 na’in 24 ne’e rekuperadu hotu ona, durante semana tolu ona laiha kazu foun.

Total kumulativu suspeitu sira ne’ebé halo ezame laboratóriu hamutuk 1.498.

“Suspeitu na’in 357 maka sei hein rezultadu laboratóriu no na’in 1.117 maka nia rezultadu laboratóriu negativu ona,”dehan nia liuhusi konferensia imprensa iha CCD, ohin.

Nia informa, total ema ne’ebé sei iha konfinamentu obrigatóriu hamutuk 41 iha Dili no iha munisipiu sira hamutuk neen (6).

Ema na’in 38 halo auto-kuarentena iha Dili no na’in rua (2) maka halo auto-kuarentena iha munisipiu.

Total ema ne’ebé liu ona loron 14 iha kuarentena hamutuk 2.242 kompostu husi Dili hamutuk 1.742 no iha munisipiu sira hamutuk 500.

Dr. Rui apela ba populasaun tomak atu kumpri nafatin regra distansiamentu sosial no nafatin mantein ijiene pesoal fase liman bebeik no evita kose liman ba ibun, inus no matan.

Rate this item
(0 votes)

Independente Digital TV