Sira ne’ebé liu ona periode inkubasaun loron 14 iha kuarentena ne’e hamutuk na’in 1261.

Kazu rejistadu ne’ebé sai hanesan suspeitu ba COVID-19 ne’e hamutuk ema na’in 168, provavel ne’ebé hein hela rejultadu hamutuk na’in 53, no sira ne’ebé negative hamutuk na’in 111.

“Kazu konfirmadu hamutuk ema na’in 4, pozitivu foun tolu, no kazu ida rekoperadu,” dehan nia, liu husi konferensia imprensa, iha CCD, segunda horsehik.

Odete dehan, pozitivu na’in tolu ne’e sira grupu ida kompostu husi ema na’in ualu, foin lalais maka sira halo viajen ho karreta travel husi Kupang mai Batugade. Sira kontinua halo viajen  mai iha Dili ho Bus Maliana, sira iha Bus laran hamutuk na’in 25, maibé ne’e seidauk inklui kondutor ho ninia ajudante na’in rua.

Sira na’in  tolu ne’ebé pozitivu daudaun ne’e hela iha sala izolamentu Vera-kruz sira na’in tolu ninia kondisaun di’ak hela, la hatudu ona sintomas hanesan, mear, isin manas, sira agora iha hela observasaun mediku sira nian.

Ba sira ne’ebé durante ne’e halo ona kontaktu ho vitima sira oras ne’e hela hotu iha Hotel Katuas, mediku sira hasai ona sira nia rán hodi ba halo teste, aban bele fó sai nia rezultadu.

 Ema sira ne’ebé foin lalais hamutuk ho vitima sira sa’e bus hamutuk ne’e aban ekipa sei tuun ba terenu hodi fó sira nia amostra atu nune’e bele halo teste maiske ohin loron sira seidauk hatudu sintomas ruma.

Tuir dadus transmisaun COVID-19 mundiál, loron segunda (13/4), provisioriamente, Estadu Unidus Amerika (EUA) mak sei as liu husi nasaun sira seluk iha mundu.

Dadus segunda horsehik iha EUA, abitante mate hamutuk rihun 22.000, afeitadu positivu hamutuk rihun 555.000.

Totál konfirmadu kazu COVID-19 iha mundu hamutuk millaun 1.846.680. Signifika millaun 1,8 abitante afeita positive coronavirus.  Husi total ne’e, pasiente hamutuk rihun 114.090 (pursentu 6,18) husi total kazu konfirmadu mak mate iha mundu.

Pasiente rekoperadu hamutuk rihun 421.722 (pursentu 22,84) husi total kazu konfirmadu. Totál kazu konfirmadu barak liu iha mundu mak Estadu Unidus Amerika rihun 500.000, tuir mai España, Italia, Fransa, no Alemaña.

Totál abitante ne’ebé mate as liu afeitadu husi COVID-19 iha EUA, tuir mai España no Italia. Enkuantu total pasiente ne’ebé rekooperadu husi España, hamutuk 62.000 (Fonte: SIJK/Kompas)