COVID-19 To’o ona Indonézia, TL Tenke Vijilánsia Featured

By Pedro Alves Marsu 04, 2020 2401
Virus corona Virus corona

DILI: Corona Virus Disease 2019 (COVID-19) alarga to’o ona Indonézia. To’o Tersa (3/3), ema na’in tolu pozitivu ona hetan virus ne’e. Tanba ne’e, Governu Timor-Leste tenke toma atensaun hodi kontrola pontu entrada sira.

 

Ministru Negósiu Estranjeiru Kooperasaun (MNEK) hateten, hafoin informasaun ne’e sai, iha Timor-Leste rasik, Governu Xina apoiu ona materiál term scanner iha aeroportu Timor-Leste hodi halo kontrolu másimu sidadaun sira ne'ebé tama sai rai laran.

Ne’e duni, membru governu ne’e apela ba sidadaun hotu-hotu karik sente kondisaun la di’ak tenke ba konsulta, tanba virus ne’e kuandu kona ema sei da’et lalais.

Sei Instala Kuarentena iha Metinaru

Entretantu, medida balun ne’ebé Ministériu Saúde (MS) hamutuk ho Organizasaun Mundiál Saúde (OMS) halo maka sei instala kuarentena iha Metinaru, hodi izola ema ne’ebé bainhira identifika afeta COVID-19.

Vise-Ministru Saúde, Bonifácio Maukoli dos Reis hateten, planu harii kuarentena iha Metinaru ne’e hanoin ona, maibé sei koordena ho autoridade atu dook husi komunidade.

Sei haree fatin iha Metinaru, nune’e instala kobe house, atu nune’e bainhira ita identifika kazu ruma bele lori hotu ba fatin ne’e no sei halo distánsia kilómetru dook husi populasaun sira,” dehan nia, iha Palásiu Governu, horisehik.

Nia dehan, governu sei tau atensaun no kontrolu másimu ba pontu entrada hotu, atu Corona Virus labele tama iha Timor.

Virus ne’e bele daet lais liu husi ema ida ba ema seluk, tanba ne’e ita presiza tau atensaun ba pontu estrada sira,” dehan nia.

Rate this item
(1 Vote)

Independente Digital TV