Projetu rezolusaun númeru 58/20 kona-ba autorizasaun deklarasaun Estadu Emerjénsia ho rezultadu votasaun a-favor 20 kontra 0 no abstensaun 0.
“Rezolusaun númeru 58/20 pasa nune’e autorizasaun estadu emerjénsia pasa ho rezerva plenária extraordinária ba konfirmasaun ba autorizasaun ida-ne’e husi Parlamentu Nasionál sei halo iha loron tersa, 11 agostu 2020,”hateten Prezidente Parlamentu Nasionál, Deputadu Aniceto Guterres, liu husi Plenária Parlamentu Nasionál, Kuarta (05/08).
Prezidente-Repúblika solisita pedidu ba Parlamentu Nasionál hodi deklara Estadu Emerjénsia iha territóriu nasionál tomak, bazeia ba Lei nú 3/2008, 22 Fevereiru, ne’ebé aprova rejime estadu de sítiu no estadu emerjénsia.
Komisaun Permanente Parlamentu Nasionál, hala’o reuniaun iha loron 5 agostu 2020 delibera bazeia ba alínea c númeru 3 artigu 102 hosi Konstituisaun RDTL no aplikasaun konjuga ho alínea c artigu 40 no artigu 48 Rejimentu Parlamentu Nasionál nian hodi halo realizasaun reuniaun plenária extraordinária ba efeitu apresiasaun prdidu autorizasaun hosi Prezidente-Repúblika hodi deklara estadu emerjénsia. Votu konfirmasaun sei hala’o iha loron 11 agostu 2020.
Pedidu Prezidente Repúblika, Francisco Guterres ba Parlamentu Nasionál bazeia ba Konsituisaun RDTL artigu 85 alínea g hodi deklara Estadu Emerjénsia iha territóriu nasionál tomak, hahú hosi loron 6 agostu to’o 4 setembru 2020
Autorizasaun estadu emerjensia aplika ba zona fronteira, aeroportu no portu ho nia medida sira mak hanesan
a.Sirkulasaun internasionál sira bele kontrola liuhosi portu, aeroportu, postu fronterira terrestre impede labele mai territóriu nasionál Timor-Leste nian nune’e evita propagasaun epidemia
b.Liberdade sirkulasaun no fixasaun (fixação) iha rezidénsia kualkér pontu iha territóriu nasionál no kontrola hosi autoridade kompetente, halo restrisaun ba komunidade hodi redúz risku kontájiu.
c.Direitu rezidénsia, ema hotu sei hela iha uma no kontrola hosi autoridade públika durante ezekusaun estadu emerjénsia.
Iha mensajen Prezidente-Repúblika nian hateten pandemina COVID-19 iha ona provokasaun daruak iha ameasa mundu tanba ne’e Timor-Leste tenke prepara-aan.
Pedidu ne’e aprezenta ba Parlamentu Nasionál, ohin, hodi asegura governu iha meiu legál nesesáriu hodi halo intervensaun rapidamente hasoru surtu COVID-19 iha Timor-Leste.
Timor-Leste hetan hikas moras Covid-19 na’in ida no pasiente hetan ona tratamentu iha fatin izolamentu Sentru Saude Vera Crus Dili.
