“Nia lójika pensamentu ne’e kuandu nomeia ona no eleitu ona nu’udar Prezidente Parlamentu Nasionál tenke simu pose pois halo diskursu para ema hotu hatene,” dehan nia, iha Parlamentu Nasionál, horisehik.

Iha sorin seluk, Xefe Bankada FRETELIN, Francisco Branco hateten, iha tempu badak Prezidente Parlamentu Nasionál, Aniceto Guterres, iha inisiu sesaun lejizlatura sei halo serimónia rituál hodi rekompoen fila-fali Meza Prezidente Parlamentu Nasionál no aproveita situasaun ne’e mós sei halo diskursu públiku.

Nia esplika, Aniceto Guterres la simu pose tanba Prezidente Parlamentu Nasionál hanesan órgaun kolejiál ne'ebé halo ona juramentu hanesan deputadu.

“Prezidente Parlamentu Nasionál la'ós órgaun unipessoal, nia hanesan órgaun kolejiál ami-nia juramentu ne’e dala ida de’it, so iha tan deputadu foun maka nia bele halo juramentu, ida ne’e maka tenke klaru. Órgaun unipesoal sira maka halo juramentu no pose, maibé ne’e órgaun kolejiál no ami hotu simu pose dala ida de'it,” dehan nia.

Nia afirma laiha regra ne'ebé define Prezidente PN tenke halo diskursu no bainhira seidauk halo diskursu nu’udar labele dirije plenária.

Branco hateten, hanesan lider PN nian no mós nu’udar órgaun soberania ida, maibé hola parte ba órgaun kolejiál, tanba ne’e la simu tan pose tanba maioria membru PN mak hili nu’udar Prezidente PN, tanba ne’e nia sei halo mensajen.